獅子撲襲鯊口徘徊戴尚安帶美玩命保育
攝影師戴尚安為了喚醒大眾關注環境保育，早前率領舊愛謝婷婷、名模樂基兒及姚書軼等，冒着被獅子攻擊、被紅毛猩猩射尿、被鯨鯊吃掉的危機，遠赴外地與野生動物拍照！他賭上性命，更甘願犧牲個人感情生活，保持單身以應付每天18小時的馬拉松式工作。
名媛李桂蘭兒子戴尚安（Sean）向來關注動物瀕臨絕種問題，並成立非牟利組織「PROJECT C：CHANGE」，藉此喚起人們對野生動物及環境保育的關注。他早前邀請舊愛謝婷婷、名模樂基兒、姚書軼及Jocelyn Luko等遠赴非洲及印尼等地拍攝，與野生動物作零距離接觸！
紅毛猩猩蠱惑射尿
提到拍攝的難忘事，他指婷婷在海中與鯨鯊合照最具挑戰性。Sean有20年潛水及浮潛經驗，但坦言在水中拍攝，比起在地面拍攝難10倍！他指拍攝器材沉重，加上在水中無法溝通，又要靜待鯨鯊經過，所以這輯相片足足拍了4天，他說：「每當有鯨鯊經過，婷婷就要閉氣游埋去，又冇得戴泳鏡，所以咩都睇唔到。加上佢着咗條長裙，喺水入面會變到好重、好難郁，但佢仲要擺Pose，真係好犀利！」他笑言鯨鯊不吃人類，卻會誤以為人類呼吸時吐出的氣泡是食物，所以不時張開口游近他！
要數最驚險的一次，肯定是婷婷與獅子合照，他說：「嗰日係我哋第一日影，我同婷婷準備同一隻雄性獅子影嗰陣，突然有隻雌性獅子衝去撲向隻雄性獅子度！佢哋不斷追逐，我哋就企喺中間好驚同好愕然，好彩最後都冇事！」除了獅子外，婷婷亦有與豹合照。拍攝過程有驚險事，亦有趣事，他笑說：「紅毛猩猩好聰明，成日會嚟搶我部相機，又會扯樂基兒條裙。同埋佢哋喺樹上面，我哋就喺下面，有時會畀佢哋啲尿射到濕晒！」Sean又安排Jocelyn與全球僅剩3隻的北方白犀牛合照，他說：「當地政府安排咗守衞喺佢哋身邊，24小時保護佢哋。即使拍攝過程中，佢突然攻擊我哋，守衞都一定唔會射殺佢，因為實在太珍貴！」
日做18小時 謝絕戀愛
除了慈善組織外，Sean亦要打理製作公司，忙得連拍拖時間也欠奉，他說：「我每日都工作16至18個鐘，如果有自己嘅家庭或者小朋友，一定冇咁多時間。不過，我做嘅所有嘢都係我熱衷嘅，唔會覺得係為工作，反而係為興趣。」他表示會繼續關注野生動物的項目，希望下次有機會到南極或北極、亞馬遜森林及俄羅斯等地拍攝，並計劃邀請國際影星及模特兒參與拍攝。他亦會籌備更多不同項目，從而喚起人們對玉林狗肉節及塑膠問題的關注，全力守護地球！
Like里奧仔愛地球
Sean曾與多位國際影星合作，包括「萬人迷」碧咸（David Beckham）、「里奧仔」里奧勒度狄卡比奧（Leonardo DiCaprio）及國際時裝設計師Marc Jacobs等。他多年前曾為《Asia Tatler》旗下雜誌採訪里奧仔及進行拍攝，坦言欣賞對方勇奪奧斯卡影帝時，在台上呼籲觀眾關注全球暖化問題，夠晒「貼地」。
Profile
姓名：戴尚安（Sean Lee-Davies）
年齡：37歲
香港名媛李桂蘭與英藉前大律師戴偉詩的三仔、前民政事務局常任秘書李麗娟姨甥。
資深電視及電影製作人、導演及節目主持，曾擔任《Asia Tatler》旗下15本雜誌的編輯總監，亦曾主持無綫明珠台節目《TYCOON TALK》及新加坡電視真人騷節目等。
文：名人組
場地：KOKO