城城愛的呼喚方媛想成家生B

舞台王者郭富城在紅館舉行共15場的「郭富城舞林密碼世界巡迴演唱會2016香港站」前晚開鑼。現年50歲的他去年底罕有認愛，雖然女友方媛因工作關係，今次未能來港觀看首場演出，但城城當提到去年與小女孩拍有關親情的微電影時，突然感觸起來，坦言希望成家立室，有自己的小孩，他感慨說：「我都唔細喇，但呢刻嘅工作都好緊要。」唱畢《愛的呼喚》後，城城繼續感性mode：「人大咗好易感動，但好少令我唱唔到落去，今晚你哋實在太好喇！開一個演唱會唔容易，仲有咁多好嘅fans默默支持自己……」

忍淚感謝Fans支持

強忍淚水的城城停頓了近十多秒，之後表示出道至今轉眼25年，經歷過很多甜酸苦辣：「就算再辛苦或者受傷都唔緊要，因為我知有你哋支持我！」台下歌迷即大叫「錫晒你」、「喊啦」，他說：「男兒有淚不輕彈！我應承自己，會將大家嘅鼓勵好好放入心中，我唔知仲有幾多個25年，相信下個25年我都百年歸老，但我無悔可以喺呢個舞台同大家分享音樂同人生！」除了感性，城城也大玩性感，身穿粉藍色透視裝的他多謝其代言的健身公司時，突然脫去外套騷肌，笑說：「練到咁大隻，睇吓先啦，要騷吓quali，得唔得呀？聽人講練到一身肌肉要擺吓pose！」讓觀眾大飽眼福。城城也再挑戰「高」難度演出，與舞蹈員升至2層樓高玩空中鞦韆，期間更雙手打開，沒扶兩旁鞦韆架。事後城城透露背後有隱形威吔，做足安全措施。

城城與舞蹈員大玩高難度動作，視覺效果震撼。	城城戴上鳥籠頭飾，大玩空中盪鞦韆。	城城攬住經理人小美，慶祝頭場個唱順利完成。

預告女友會捧場

受訪時，提到在台上透露想成家立室，城城表示將來一定會，記者以為他會在台上求婚，他說：「我一定唔會喺台上求婚，我其實係好低調嘅，因為平時工作已經好多姿多采，但喺我生活入面，我希望係好平實、低調。」他又坦言雖然女友未能親身到場支持，但有祝他演出成功：「過幾日等佢工作冇咁忙，佢都會飛嚟睇我嘅。」

城城又指籌備今次個唱非常困難，因為希望突破過去三次「舞林」系列的演出：「壓力大咗嘅，呢個壓力係嚟自我自己，我想對得住大家，畀大家感受到我係會繼續努力，觀眾好多時都自動自覺，唔係要我叫佢哋點樣，佢哋真係好錫我。」

文：音樂組

攝：黎志輝、司徒國榮