現年28歲的天后Rihanna日前在比利時開騷，足足遲了1小時才出場，被全場6.6萬名粉絲噓爆！不過她依然唔知衰，騷上不停爆粗，更幾乎全程咪嘴，辣㷫數百名粉絲拉隊離場！
人氣天后Rihanna今年舉行的巡唱《Anti World Tour》不太受歡迎，有大量空櫈，但她依然未知驚，8月18日在比利時哈瑟特開騷時竟遲到足足1小時才出場，令現場6.6萬名粉絲鼓譟，Rihanna一蒲頭就被噓爆！不過她依然未知衰，指遲到全因服裝有問題，但在個多小時的表演中完全沒有換造型。
演出開始後粉絲更為憤怒，事關Rihanna全晚不停讀錯「Belgium」（比利時）一詞，又頻頻爆粗：「Fxxk」，令粉絲覺得被冒犯。最激心的莫過於粉絲等了又等，卻只等到Rihanna咪嘴演出，全晚只得《Diamonds》一曲是現場演繹，有粉絲完騷後留言批評：「如果係咁，我不如喺車聽Rihanna隻碟好過啦！」、「我鍾意Rihanna，不過絕對唔會再買飛捧場，佢除咗咪嘴同全晚不停扭身體，咩都唔做！」Rihanna毫無誠意，最終令現場數百名粉絲頂唔順拉隊離場！其實Rihanna這場演出是為了補償原定上月21日舉行、後來因安全理由而取消的演出，豈料粉絲統統被辣㷫。
Rihanna完騷後懶理批評，在社交網站Instagram留言：「你哋今晚真係好正！好多謝你哋咁大方！愛你哋！」前晚更風騷出巡，以超低胸造型在英國倫敦夜蒲。
文：外娛組