懶分老公定老婆 王賢誌冇諗要B
王氏港建集團主席王忠桐兒子兼東華三院副主席王賢誌（Vinci），8月1日與拍拖七年的初戀情人Kevin於溫哥華結婚，是香港圈中首對公開的男同性婚姻。Vinci昨日婚後首次露面，左手戴上婚戒的他春風滿臉，大方談及婚姻生活，並表示暫未有計劃搵代母生B或領養小朋友。
Vinci中午時分相約著名公關好友鄭紹康食飯，兩人即場玩facebook直播，晚上則出席好友設計師何國鉦舉行的婚紗騷。Vinci玩直播時Kevin亦有陪同，但就未有出鏡。Vinci表示婚後與家人一齊坐郵輪到阿拉斯加旅行：「點解揀8月1日（結婚）？因為8月3日就踏入農曆7月，一定要7月前做咗呢件事，多謝大家祝福。」Vinci坐郵輪去看了冰川、划獨木舟又玩淘金，笑言Kevin不是咖啡師，是淘金師，因平日沖咖啡拉花技巧令他淘到不少金。問到會否想效法「樂壇大姑媽」艾頓莊（Elton John）擁有自己的小朋友或領養？Vinci說：「冇諗過，我工作好忙，冇時間去照顧，而且結婚唔係為咗呢樣嘢，冇諗到咁詳細。」
冇求婚唔補擺酒
而婚紗騷上Vinci左手戴上婚戒單拖出席，問到他如何稱呼另一半？他笑言：「冇乜特別分（老公老婆），都係嗌佢個名。今次結婚係好突然決定，因為家人計劃去加拿大旅行，咁啱Kevin又得閒，就一齊去。突然諗起加拿大（同性戀婚姻合法），不如就結婚。（邊個提出？）我，大家之前有傾過，但冇機會實行。（有求婚？）冇，一啲都唔浪漫同埋好倉卒，喺兩個月內完成婚禮。（香港補擺酒？）唔會喇，接觸過香港擺酒嘅地方都要一年前訂，或者各自同朋友食飯。（家人全力支持？）家人一早知我嘅性取向，已見過另一半好多次。（融入對方家中？）向來好似親人咁。係行前咗重要嘅一步，因為再大年紀未必有機會做，唔想好老時先做，依家階段穩定，雙方家人OK咪做囉！」
多給包容毋須匿埋
已第六次舉辦婚紗騷的何國鉦談王賢誌新婚，即送上祝福，大讚對方勇敢：「其實係佢兩個人嘅事，佢哋開心咪得，我睇住佢哋拍拖結婚，好替佢開心。我唔係鼓吹，但可以畀年輕人睇到唔使再匿匿埋埋，大家多啲包容。」
文：名人組