陳琪投訴老公 10卡鑽戒走數
腹大便便的陳琪與前藝人陳樂榣昨午分別帶囡囡欣賞《妖怪手錶舞台劇：地縛喵的秘密》演出。10月中臨盆的陳琪「投訴」老公胡諾言開工未能同行，但大讚兩個囡囡貼心：「大家姐話要學抹地，幫手做家務，細妹把口好氹得人，成日提我小心啲，又會扶我。」
雖然有兩個婦產科醫生照顧，但陳琪表示至今仍未與BB「會面」：「產檢次次都照唔到佢個樣，醫生話依家個胎太大，相信要等出世先見到。（改咗名？）英文名叫Jayden，係生大家姐嗰時已經改咗喺度，留到依家先用得着。老公又唔怕我呷醋，竟然睇中咗個女仔名想改畀個仔，不過要等佢出世夾八字先再決定。」
餵母乳補奶粉
陳琪又打趣指老公曾承諾生仔的話送十卡鑽戒：「不過依家再問佢，佢就扮懵。（日後餵母乳？）可能溝溝吓餵，生大女時唔夠餵，畀好大壓力自己，會坐喺度喊，依家學識放鬆。」
至於陳樂榣與已一歲多的囡囡Arie捧場，又表示最近有意擴大服飾生意。談到哺乳，她說：「依家仲餵緊，想餵到2歲。遲啲搬咗公司會喺茶水間增設一角畀女同事泵奶，方便大家。」
文：影視組