馮盈盈驚爆 曾被癡漢壓背抽水
身在日本的十位候選港姐昨日於火車進行拍攝，談及「癡漢」經歷，大部分都慶幸未曾遇過，但(6)馮盈盈卻自爆小時候曾有類似經歷卻「唔識驚」，事後更慘被母親教訓一頓，她呼籲女士們「應該即刻出聲嗌唔好，要保護自己」！
【陳永峯日本直擊】《2016香港小姐競選》十位候選港姐在日本福岡拍外景，無綫包下西鐵「旅人」列車拍攝，並前往著名的觀光景點太宰府戒壇院，由(1)關可欣、(4)代蓮曦丹美及(8)阮嘉敏進行打坐，展現港姐儒雅一面。
試過Cosplay扮學生
(6)馮盈盈有豐富的日本旅行經驗，對於包車安排笑言感覺特別：「今次喺火車拍攝經驗好難得，包咗架車唔會騷擾到人。」又表示不時在鐵路上遇見Cosplayer：「覺得好注目。（試過玩Cosplay？）試過扮演一個校園愛情動畫主角。（扮學生有癮？）我本身都係學生。」問到曾否在鐵路上遇不愉快事件？她說：「小學生嗰時遇過，有個叔叔壓咗喺我背上，當時太細個唔識出聲，返到屋企同媽咪講，畀佢鬧蠢同好傻，應該即刻出聲嗌唔好，要保護自己。」
劉穎鏇獲父母
而(5)蘇韻姿面對空蕩蕩的車廂笑言不習慣，對於外景拍攝進入尾聲，她說：「平時同啲女仔都係返工先見，今次一起身就見到，覺得好似去緊Camp。（比較冇好勝心？）自己唔係好競爭嘅人，好享受今次過程，第時睇番相都會有好多回憶。」身形高大的大熱(2)劉穎鏇自言是怕醜妹一名，今次行程令她成長不少：「增加咗自信，中文有進步。（年紀較輕會輸蝕？）唔會，係感覺到自己成長緊，父母喺L.A.（洛杉磯），遲吓會返港幫我打氣。」
文：影視組
