張繼聰心口中掌 撩阿諾猜枚
張繼聰操出Fit爆身材轉型為爆肌型男，連有「世界先生」之稱的荷里活巨星阿諾舒華辛力加都忍不住「揸」阿聰胸肌過手癮，阿聰則撩偶像猜「十五二十」！屬廿四孝老公的阿聰自爆陪老婆謝安琪浪漫跑步時會變身保鏢。
荷里活巨星阿諾舒華辛力加（Arnold Schwarzenegger）昨日於香港亞洲國際博覽館為「阿諾國際體育節（亞洲站）」主持開幕禮，司儀伍家謙介紹體育節內容後進行醒獅表演，阿諾主持醒獅點睛儀式。阿諾巡視各比賽場地，再到攤位拍照及為參賽運動員打氣，約有二、三十名工作人員及保安築成人鏈為阿諾開路，有粉絲在混亂中跌倒。阿諾的41歲物理治療師女友Heather Milligan亦與他同行，不過見她有點凸腩，身材不夠阿諾Fit！
心跳加速讚友善
而藝人張繼聰昨日以健身品牌代言人身份現身跟阿諾合照，阿聰驚喜稱阿諾主動跟他握手，令他心跳加速，並搞笑說：「我同佢講Welcome to Hong Kong，問佢猜唔猜番兩板十五二十。佢拍我心口叫我繼續努力做Gym！（係咪佢Fans？）有邊個唔係呀！我哋啲80後睇佢電影成長，我廿幾歲開始健身，都有睇佢點樣贏晒全個世界！」他直言雖不是玩專業健身，但明白箇中苦況及付出，所以非常尊重阿諾，視阿諾為傳奇人物。
陪老婆跑步似做保鏢
阿聰直言想薰陶兒子愛做運動，亦想感染囝囝要經得起風浪：「阿仔都鍾意做運動，畀佢放吓電。（有一家人做Gym？）每日做一下Sit Up，就係起身嗰下。」他笑指跟太太謝安琪的層次相差太遠，因男女速度有分別：「如果要浪漫咁一齊跑，我係要行，為咗就佢我就會自己跑完先，之後返嚟拎住水同喇叭播歌，好似保鏢咁囉！」
文：音樂組
攝：黎志輝