校長攞正牌睇戚美珍靚股
樂壇校長譚詠麟（阿倫）、戚美珍（三嫂）、伍詠薇及陳小春等日前為新片《江湖悲劇》宣傳，相隔多年再次合作的阿倫與三嫂於戲中飾演夫妻，阿倫笑言一見面就要出手揭三嫂裙底，攞正牌睇靚股。三嫂透露除了被阿倫睇股，更有激咀戲：「對上一次合作應該係1983年拍MV。（阿倫話你係唯一拍過多次MV都冇錫過嘅對手。）我條氣幾唔順呀，所以今次我誓報一戰之仇，一定要出力咀佢，由我主動咀到佢歪晒嘴為止！」
仔女遺傳表演基因
提到三嫂女兒苗彤近日擔任今屆港姐外景攝影師而備受注意，問到可會捧女兒做接班人？她笑說：「你問佢啦，我真係唔夠膽代苗小姐講呀！女大女世界。（仔女想入行？）佢哋唔會咁講，個女讀art，對電影同表演有興趣，我諗都有啲遺傳。（佢幫你影相？）一家人出去玩時，佢攞住相機逐個影。（佢幫你美圖？）冇，佢淨係影相，都好嘅，影吓影吓變咗一技之長。」
譚詠麟化妝：Eva Chuk@Faces make-up studio
譚詠麟髮型：Perny Tang@Silkcut Salon
場地：E-MAX