張繼聰谷爆42吋胸同阿諾鬥肌

張繼聰太太謝安琪（Kay）自年初宣布暫別幕前一年，專心相夫教子及展開造人計劃後，將搵錢重任交由阿聰一力承擔。近月頻頻在社交網晒健身相的阿聰，原來秘密以50萬元接拍健身補充品廣告，展開為期數個月的地獄式訓練，務求以巔峰狀態拍攝，而最大目標是於本周六的記者會上，與健美運動員出身、有「世界先生」美譽的69歲動作巨星阿諾舒華辛力加鬥Body！

焗食冇味餐

據知，阿聰為了煉成36歲仔最勁的42吋胸肌及8舊腹肌而吃盡苦頭，連月來戒油、糖、鹽外，還堅持每日到健身室舉重及跑步數小時，而最難捱是拍廣告前三日，他在電話中說：「健身教練要我喺脫水狀態下拍攝，所以有三日連水都唔可以飲，最慘係拍廣告前，我拍咗12個鐘頭電影，全部鏡頭都要跑嚟跑去，之後就通宵拍廣告，真係好辛苦，好考意志力！」問到三日滴水不沾如何維持生命？他說：「當真係好頂唔順時，都可以飲一啖水，不過只係濕一濕口，要吐番出嚟！唔使擔心我會死，因為可以食生果，生果同烚雞肉都有水分。」

現年69歲的阿諾，年輕時演盡大隻佬角色，型到爆！	阿諾舒華辛力加	謝安琪放假期間盡情歎世界，搵錢重任就交畀老公阿聰。

談及與阿諾快將見面，阿聰興奮地說：「梗係好榮幸啦！（鬥大隻？）我點同佢呢啲專業運動員鬥，況且我係演員，太大隻會局限角色。」問他渾身是勁，會否擔心有同性追求者？他哈哈大笑說：「我結咗婚o架喇！男、女都打動唔到我！」阿聰又感激太太為他研究餐單：「佢準備咗好多唔同款嘅健康餐，又搵無油嘅Nuts畀我食，我開工啲飯盒好大陣仗o架！」

謝安琪心痛

至於Kay亦很心痛老公，她在電話中說：「老公練得咁辛苦，我都心痛，我好少佩服人，但今次真係佩服佢，因為佢拍戲已經好攰，但返到屋企仲喺房玩健身球，未天光、喺開工前又出去跑步。而且食嘢係開心事，但佢食啲冇味嘢，我都幫唔到佢啲乜，只可以幫佢準備好佢需要嘅食物。」據知阿聰近年密密賺，由年初至今已接下7個廣告及6部電影，連同商演及劇集，估計穩袋逾7位數字尾，難怪Kay不時上載遊埠歎世界的照片。

文：音樂組