王宝宝火辣慶生隊廿支香檳
模特兒王宝宝（春卷）27歲生日，獲好友大搞泳池派對及遊歷港澳慶生。一眾模特兒好友更穿上性感泳衣，「big」波蕩漾，大晒美好身段，反而壽星女春卷最為密實，對於峰頭被搶，春卷表示唔介意更自爆豪飲廿支香檳！
模特兒王宝宝（春卷）早前27歲生日，獲好友分別在港、澳為她賀壽，令她大感驚喜。她說：「我哋喺香港食晚飯慶祝，之後去咗澳門訂咗間酒店Villa開泳池派對，我哋帶晒食物同二十幾支香檳，最後飲晒全部香檳。」春卷與四位模特兒好友齊齊穿上泳裝，大騷身材，不過春卷的一件頭泳衣卻最為密實，不及其他女性好友性感搶鏡，春卷對此大方表示：「唔介意，我係壽星女，特登要求佢哋着得性感火辣過我。因為今次係泳池派對，所以泳衣係dress code。」
只愛收超市禮券
春卷透露與一眾模特兒好友已相識多年，姊妹們每一年都會為她慶祝生日。問到有何生日願望？春卷表示：「希望日日都咁開心。（收到咩禮物？）我比較實際啲，叫朋友送超市禮券畀我，最實用，哈哈！」
為好友設計餐廳
至於工作上，春卷透露剛為有線拍畢旅遊節目，正於澳洲度假，享受陽光與海灘，回港後工作將一浪接一浪，包括為朋友的新餐廳設計裝飾，她說：「我之前都有設計過餐廳，但都係好多年前，今次係朋友叫我幫手。」
文：名人組