容祖兒大髀遭殃放血3次
天后容祖兒在舞台上威風八面，但實則是「容易受傷的女人」，屢受皮肉之苦，自爆參加內地真人騷節目時，雖避過爛樹幹插pat pat之災，但仍逃不過大髀側掛彩之難，要忍痛用梅花針放血去腫，男友劉浩龍見狀也痛埋一份。
容祖兒近年頻頻返內地工作賺人仔，至昨日才有空到電台宣傳六月時推出的唱片，自爆之前拍攝要又跑又跳的內地真人騷《全員加速中》遇險，事緣她在沼澤拍攝追逐環節時，因泥地太濕滑而跣倒，跌正一條斷開的樹幹上，她還笑謂：「真係差少少就插中pat pat位，不過都撞到大髀側邊，腫咗一個波咁，之後要用梅花針放血，足足放咗3次血先得。」
劉浩龍感心痛
祖兒戲言疑屬猴犯太歲，在參加內地歌唱比賽《我是歌手4》時扭傷腳，而翻查祖兒的微博，她早前也曾上載過一張受傷照，當時正拍攝《全員加速中》的她留言：「為了一個節目，我也記不得自己傷了多少次，但雙子（座）就是好勝，永不服輸。一切都是值得的。」
問到祖兒施針放血痛嗎？祖兒直言：「都痛o架，痛到要咬住自己。」問男友劉浩龍可心痛？她說：「佢都戥我痛。」笑問是否由男友負責施針？祖兒指醫生施針，並非男友。
提醒及時行醫
講到劉浩龍日前到醫院探望傳患肝病的陳子聰，祖兒不願多言：「問我呢樣嘢，我唔識答，自己都冇多口問，人哋屋企都冇講，唔輪到其他人去講。」而祖兒母親之前亦患病，她說：「生命好重要，要及時行樂，及時行醫。」會否及時結婚生仔？她謂：「我仲有啲時間，雖然時間一分一秒流逝，但唔使為我擔心。」
另外，昨日約三時半，梁漢文手持一袋零食到醫院探陳子聰，逗留逾一小時多才離開，問梁漢文為何買零食？他就話：「好多朋友嚟咗探佢o架喇。」
文：音樂組