定欣胸襲袁偉豪受傷入院
胡定欣與袁偉豪昨日宣傳新劇《城寨英雄》，劇集收視再創新高，當中胡定欣狂摸袁偉豪胸肌「抽水」一幕成為熱話，定欣自爆拍攝摸胸戲摸到手指公拗柴入院，她笑說：「感覺好奇妙，胸肌好立體。」
無綫劇集《城寨英雄》演員胡定欣、袁偉豪及王君馨等昨日在將軍澳谷劇，同時公布收視喜訊，前晚第九集錄得播出以來最高的31.3收視點，逾203萬觀眾收看，平均收視29.1。眾演員除了即席比試拳腳，定欣與王君馨更賣弄風騷爭奪袁偉豪。而定欣日前被袁偉豪和陳展鵬連環揼心口施心外壓拯救一幕，成為熱話，定欣受訪時說：「冇諗過大家對呢幕有咁大反應，為咗效果逼真，足足拍咗兩日。佢哋兩個都好好，好錫住我，見掂到就收用反應搭夠。（尷尬？）唔會。」袁偉豪表示最重要是互相信任，事前已溝通好，並笑說：「最辛苦梗係定欣啦！畀我同展鵬蹂躪。」
笑言摸得太肉緊
而前晚一集講到定欣狂摸袁偉豪胸肌「抽水」，她笑說：「拍呢幕摸到手指拗柴，要即刻入醫院照X光，可能拍得太肉緊，不過最擔心係佢啲女粉絲打我。（怕唔怕佢女友嬲？）佢女友好大方。」袁偉豪則說：「我畀定欣抽水都抽得好開心，佢唔尷尬，我當然享受啦！」而定欣愈講愈興奮：「從來都未試過咁樣摸男人個胸，佢當時好弗，摸落好立體，感覺好奇妙。」又希望收視一路升及口碑好，袁偉豪則希望有35點甚至40點收視。
「鑫鑫」林穎彤工作增
另外，林穎彤憑劇中「鑫鑫」一角跑出，多了不少工作，她說：「依家出街大家都叫我鑫鑫，問我（劇中）爸爸幾時死，又話早知畀夏滿哥『開苞』好過下場咁慘。」劇中她被輪姦至死，更有個衰爸爸，現實中同樣可憐，來自單親家庭的她與母親相依為命：「拍攝時投放咗自己感情落去。」她表示知道生父已有自己的家庭及生活，亦沒有想見對方：「由細到大我都跟住媽媽捱窮捱大，但都希望爸爸健康同開心。」又表示現時最緊要畀心機工作報答母親。
文：影視組