港男梁裕恆疑「畀鬼責」腳軟失魂

無綫《2016香港先生選舉》10位候選港男前日抵達台灣屏東拍外景，經過首日單車訓練後，眾男返回酒店休息，獲大會安排每人住一間靚房，大熱門「爆肌消防員」梁裕恆急不及待在網上激讚房間Very good，並上載爆肌自拍照。

雖然未到農曆七月十四，Flow卻「率先」遇到靈異經歷！他留言表示疑似「畀鬼責」，更出現幻覺，驚見一盆火百合：「瞓唔着，畀鬼壓，其實科學有得解釋，太攰就會咁。不過啱啱最正係有埋幻覺同幻聽，面前無啦啦有盆火百合，間房變晒形，仲有人喺度不停唸經，感覺好刺激！我唔信有鬼的，只想快啲瞓得着……望真啲間房，好似古代啲監獄，好似困死囚咁，咩設計嚟，玩嘢……」其後卻刪走貼文。

郁唔到幾好玩喎！

10位候選港男昨日繼續拍外景，並分成兩組分別挑戰攀山和滑水，Flow與「翻版古天樂」(4)黎振燁（Jackson）、「翻版許志安」(8)伍禮騫（Thomas）、「程可為姪仔」(7)楊灌澤及(9)丁子朗玩攀山。期間，Flow被追問靈異經歷，他吞吞吐吐，表示不信邪：「發夢啫！不嬲唔驚。（第一次經歷？）都唔係，人生有4、5次，都係比較攰嘅時候，我唔覺得係鬼，我唔信有鬼。（有冇要求調房？）冇呀，照瞓。科學書都有解釋，通常攰嘅時候會出現所謂『畀鬼責』嘅情況，我想郁但係郁唔到，感覺幾好玩。（聽到聲？）冇呀！（講粗口趕佢走？）下次試吓。（平時會唔會講粗口？）極少，1年可能講3、4次，避免唔到先用。」昨午，眾男在沙灘拍攝，未知是否撞邪唔夠瞓，神不守舍的Flow孭起楊灌澤時竟然唔夠力，險將對方撻落地，其後他被眾男包圍作狀玩除褲，此時他才重拾笑容。

Flow「畀鬼責」，除了聽到有「人」誦經外，間房仲無端端有火百合！	（後左起）麥凱程、梁裕恆、胡㻗、黎振燁、鍾君揚 （前左起）馬俊傑、楊灌澤、伍禮騫、丁子朗、梁賢基 一眾候選港男在沙灘拍外景，玩互孭搞氣氛！	Thomas邊下坡邊自我鼓勵，無驚無險就到地喇！

黎振燁跣腳傷膝

此外，身形高大的Jackson竟然畏高，雖然最終順利攀山完成使命，但膽怯的他一度跣腳，不慎擦損膝蓋，他笑說：「我自己都驚自己o架！（克服到恐懼？）頭先可以，依家落番嚟問我會唔會再玩？我可以肯定咁答，唔會！（頭先跣腳？）對鞋唔係好適合，少少損傷在所難免。」反觀同組的Thomas則大膽得多，落坡時不停自我鼓勵，大叫：「我得嘅！我冇問題嘅！」其後表示以往有玩刺激運動，如笨豬跳。記者問畏高的Jackson可有試過玩笨豬跳？他驚訝地說：「吓？呢樣（攀山）都冇啦！試過合埋眼玩跳樓機，以為冇乜嘢，但衝力反彈番上去！（女友有冇嫌你細膽？）冇咁嘅事！我唔會同佢玩呢啲。」

梁裕恆（左起）、黎振燁、丁子朗、伍禮騫與楊灌澤挑戰攀山。

咪睇Jackson咁高大，原來佢畏高o架！