曾與美國女模Carmen Electra拍拖的前NBA球星「妖蟲」洛文（Dennis Rodman）近日受訪，自爆曾三次「斷J」的慘痛性愛經歷，指與女友試玩新招，想助跑「穿針入洞」，不料失手「撞框」，受傷兼周圍都係血！
因擅長搶籃板球獲「妖蟲」美名的傳奇籃球手洛文，雖已退役多年，但他近年與北韓領袖金正恩交好，再度成為新聞人物。洛文接受Viceland訪問，大談性愛經歷，原來他曾三次因過度激烈的性愛動作而令陰莖折斷！洛文憶述首次「斷J」經過：「我同女友喺遊艇入面一張大床，咁佢話佢想試吓新招，叫我行遠之後，助跑衝前『撞入去』！」
雖然洛文彈跳力驚人，惟精準度卻不足，他指當時聽到「啪」一聲，然後看見周圍都是他的血。當時女友更嚇到尖叫：「天啊！佢死咗，佢死咗呀！我殺咗佢呀！」洛文惟有反過來安慰她：「唔係呀！Honey，我只不過係斷咗條J。」他未有透露該女友身份，但網友懷疑是其美國女模舊愛Carmen Electra，亦有指可能是曾與他傳緋聞的美國天后麥當娜（Madonna）。
洛文指第二次「斷J」是他效力底特律活塞隊期間，與一名叫Tracy的女子在酒店進行「活塞運動」，再次出事。所謂事無三不成，洛文再詳談他第三次「斷J」經驗：「事發喺紐約，又再嚟多鑊，我哋去咗酒店搞嘢，又斷過！我哋去到醫院，我女友就話：『件事係咁嘅，佢條陰莖出咗事！』個女護士聽到就話：『噢！我再返嚟。』然後帶咗一個醫生嚟，之後又帶多個，我發誓佢冇停過帶人入嚟睇我。佢哋同我講，我有陰莖挫傷。」洛文更聲稱翌日有護士致電他女友，出價2萬5千美元（約19萬5千港元）買其陰莖的X光照片，他女友即時回應：「OK呀！冇問題。」不過洛文強調他胯下的「妖蟲」已完全康復，運作正常：「我依家已經冇問題，隨時可以打過呀！」
泌尿科專科陳龍威醫生表示，陰莖折斷是指陰莖在勃起狀態下，外在暴力招致陰莖白膜破裂。在受傷瞬間常有響聲和劇痛，此時勃起的陰莖也隨即鬆軟，陰莖會呈現瘀血、出血及腫脹。此時應立即停止進行中的性行為，並送院接受治療。輕微情況靠藥物治療，重則要接受手術，以避免併發症發生。若手術後復原良好，一般不影響往後性功能。
文：外娛組