張家瑩帶30磅靈龜出巡
亞姐冠軍張家瑩（Grace）日前帶同寵物陸地龜到公園散步，引來不少途人的注目，她透露是從朋友手上領養龜龜Biggie：「因為隻龜愈嚟愈大隻，而且食量好大，朋友養唔到，所以我就收養咗佢。我養咗1年，佢依家3歲，大約重30磅，每日要食1斤菜心同埋龜糧，個身形會繼續大！」
Grace不時帶Biggie落街散步，每次都會引來途人的好奇目光，間中更會有人上前搭訕。她認為Biggie步伐緩慢，是很好的散步伴侶，但飼養陸地龜殊不簡單，居住的地方最為講究：「佢好怕凍，容易感冒，所以要有射燈照住，但又唔可以長期照，否則會曬傷，所以住嘅地方要有兩個門口畀佢出入。」Grace指陸地龜不像貓狗一般跟主人有很多互動，但亦充滿靈性：「Biggie好乖唔會嘈，有啲龜會成日叫，但佢唔會。初時我走近佢，佢會好驚咁縮個頭入龜殼入面，但依家已經認得我嘅腳步聲同個樣，我行近佢都唔會縮埋。」
