周汶錡萌B扭計 尷尬匿埋氹

去年周汶錡為法籍丈夫Julien Lepeu誕下可愛混血B仔Jacques，轉眼間BB已經一歲多，榮升做模界靚媽的Kathy，相當享受湊仔樂，不時晒囝囝靚相，更透露想追多個，等兒子有伴。日前Kathy在女友人陪同下帶囝囝出巡中環，往沖曬店曬相，當日Jacques一身醒目打扮，坐在BB車內邊啜手指邊到處望，得意度爆燈，吸引不少途人眼望望。

俯身安撫

不過，任憑幾得意的BB都有扭計的時候，Jacques就示範突然扭計，而且仲相當好中氣，身為名模的Kathy不禁有點尷尬，為免影響其他人，Kathy火速和女友人將BB車推到商場角落，對住落地玻璃，女友人蹲下安撫Jacques，Kathy亦俯身慢慢氹囝囝，終令囝囝安靜下來。

教路揀餸

另一天，不用行騷的Kathy相約友人現身中環，過往經常穿梭名店的她，如今棄睇靚衫，反而師奶上身和友人行超巿，更不時翹晒手如同專家般教大家揀靚餸。

文、攝：追蹤組

Jacques萌爆啜手指出巡。	周汶錡熟手揀靚餸。	周汶錡由名模變靚太，推住手推車行超市。