林保怡咀周家怡嗌Encore
藝人林保怡帶同愛犬阿水昨日於赤柱出席活動，疼愛狗狗的他直言愛犬曾經突然下肢癱瘓，結果花費六位數字的醫療費：「養狗唔簡單，而且醫療費直頭驚人！但當時我唔想佢人道毀滅，我已經當咗佢係家人。」
談到保怡日前被拍得與ViuTV劇集《瑪嘉烈與大衛系列—綠豆》拍檔周家怡當街錫錫？他說：「當晚飲多咗就瑪嘉烈同大衛上身，唔係做戲，係真o架。未來我哋見到都會咀，因為我好希望有續集。（動真情拍拖？）問番家怡，如果我係大衛就好鍾意瑪嘉烈，我要入咗戲先。（續集預埋廖碧兒？）唔知佢有冇時間拍。」
保怡明言向來不提感情事，說：「我係完全唔會提感情。（依家藝人愛公開戀情，例如王賢誌公開與同性密友註冊？）我冇咩唔公開，係唔鍾意提感情，但當然戥王賢誌開心，好事嚟！依家2016時代都轉變喇！」