何佩瑜想生B 隨時閃婚
女星何佩瑜被拍得與導演男友翁子光相處甜蜜，前晚與王宗堯、周家怡齊為新片謝票時，何佩瑜暗示已見雙方家長，男友更行外母政策。而何媽媽對翁子光評價極高，又指示她箍實男友，她亦希望生小朋友，故不排除閃婚！
何佩瑜（Jeana）、王宗堯及周家怡等，前晚現身九龍塘為主演的新片《導火新聞線》謝票，談到與導演男友翁子光在街頭拍拖表現親暱，一支煙兩份食，Jeana直認二人相處甜蜜。而男友更聲言想與她一生一世，問到有否計劃成家立室？Jeana說：「佢都唔細啦，大我十年。（屋企人催婚？）自己都鍾意小朋友。（閃婚？）唔知(口架)！（有冇傾過？）兩個月咋喎！」
王宗堯開心長紅
不過Jeana直認已見過家長，又指媽媽對翁子光評價相當高，問到媽媽可有叫她箍實對方？她說：「有呀，依家搵對象唔係開心就算，係想搵個穩定，我都大啦，冇時間。（想快啲結婚？）下禮拜囉！（今晚？）今晚囉，夠唔夠快？」
談到翁子光未習慣面對傳媒，但經常在社交網站放閃光彈，Jeana透露男友與她的朋友見面都表現怕醜，但飲酒後會變得健談，笑言下次見記者前要先灌他飲酒。獲愛情滋潤的Jeana，近日不時在社交網站晒噴血比堅尼相，深獲粉絲讚賞。
同場的王宗堯被問及票房成績，他說：「理想，見到長紅（指賣票情況），依家見到邊場紅晒就去謝票！」王宗堯更透露曾到鑽石山突擊謝票：「散場前一個鐘先決定去，當時我游緊水，miss咗十幾個call！」周家怡就稱面對多齣外語片上映，仍獲觀眾買第一、二行戲票進場，十分感動。提到ViuTV疑開拍《瑪嘉烈與大衛系列—綠豆》續集，二人均表示不知情，家怡說：「想佢哋拍多啲劇，佢哋搵我先算啦！」
文：影視組