艾美莉痛愛交纏 百萬倍感動

艾美莉憑《權力遊戲》中「龍女」一角深入民心，其後主演電影《未來戰士：創世智能》（Teminator Genisys），同樣以硬朗打女形象示人，最近她在新片《遇見你之前》當一個傻大姐，問到是否故意改變戲路，她說：「我唔會做好多策略性嘅計劃，呢個唔係我鍾意嘅做事方法。我只會睇劇本，然後畀角色或故事感動，今次感動更加係百萬倍。我一開始睇，就知道呢個係表達咗我其中一面性格嘅角色，所以要去做。」

攝時間拍戲 試新嘢！

艾美莉認為角色溫暖、富同理心與敏感，很好玩又喜歡幫人，在充斥黑暗與負面的時代中，是一個有趣的選擇；而故事除浪漫愛情外，還探討富爭議性的安樂死問題，亦令她耳目一新！片中海灘一幕令人感覺到角色心中的痛苦，艾美莉自爆拍攝時真的很痛苦：「拍呢幕戲係我從影以來最難拍嘅一日，因為我整傷咗盆骨，真係好痛！我直頭坐唔上佢大髀，實在太痛喇！」

《權力遊戲》以角色隨時死亡聞名，艾美莉的角色是少數每季存活的人，但這亦意味着她的電視拍攝時間表每年都排得密麻麻，只有少量時間可參與電影，她說：「今年我本來想喺空檔塞兩套電影落去，但個檔期太短喇！」

不過，她自言並非太有計劃的人：「我有《權力遊戲》呢個安全網，真係非常幸運，每次返去拍攝都會學到新嘢，又好似見到會教導我好多嘢嘅一班家人咁。而我喺空檔期就會試新嘢，我希望喺我事業入面可以盡量嘗試唔同嘅角色，從各方面挑戰自己。」

講虛構語言 好難頂！

問到為「龍女」一角學習虛構語言是否很辛苦？艾美莉坦言：「《權力遊戲》係我第一個工作，我當時好有熱誠！第一季時學Dothraki語，我覺得『演員就係要咁』，好正常，到咗第六季時，你就會覺得『唔好喇啩！要成個禮拜講Dothraki，真係難頂！』而且，隨住我漸漸多咗其他工作，我覺得學講時愈嚟愈辛苦，會想只係講英文！但當你做得到時，尤其你講緊一啲好有型嘅對白同做緊好勁嘅事，其實好有幫助！」她透露平日會在廚房練習，又指虛構語言就像改變口音一樣，令她變成另一個人，展示真實生活中不敢顯露的一面。

文：外娛組