唐文龍澄清冇「轉性」鍾意後生女

藝人唐文龍昨日錄影ViuTV節目時，澄清轉性向與劉永健「相戀」的報道，並大談擇偶條件：「白白淨淨，有少少身材，同埋我鍾意後生少少！」他指緋聞驚動了身在美國的雙親：「爸爸催婚喇！（咁你快啲啦！）有啲嘢冇得強求。（舊愛陳少霞有好歸宿。）我哋有微信聯絡，梗戥佢高興啦！佢男友好有型！」同場的邵仲衡則分享靈異經歷，自言多年來經常發同一個夢，醒後面上有爪痕，高人指他前生對人有虧欠，故來討債！