雨僑研發化妝掃 網盡貪靚鬼

扮靚大過天的雨僑，讀書時期已開始研究化妝技巧，其後更利用社交網站分享美容心得。港大畢業的她深明藝人工作「三更窮、五更富」，故在2012年以六位數與朋友夾份開網店，主打自家研發的化妝掃，並利用網絡平台宣傳，最高紀錄曾創出一個月50萬的生意額！

北上尋找山羊毛

香港租金、人工樣樣貴，雨僑直言「零售好難做、網上有機會」：「初時網上賣無實體店，已經慳番租金同Sales嘅人工，慳番嚟嘅錢就用嚟入貨同研發產品！」她更利用藝人身份的優勢，在網上大事宣傳。不過開業以來都試過碰釘，以自家品牌的化妝掃作主打產品的她，北上尋找廠商生產：「我要最好嘅山羊毛，點知整咗出嚟之後發現仲有更好嘅質素，於是重新再整過。無計啦，當交學費！」

商廈開舖反霸權

她曾於2013年將產品放在連鎖店賣，不過地產霸權令她決定撤架：「只要生意唔好，連鎖店就會諗唔同方法要你畀錢，例如幫你請Sales、加上架費等。」加上連鎖店的貨量需求大，直接增加其生產成本，令她在去年開始逐漸撤架，主力做網上生意。年初她更在荃灣的商廈設立公司，租金平之餘地方又大，並將辦公室布置成不同風格的角落，例如假櫻花樹、Cafe Corner、鋼琴等，務求拍出來的宣傳片能保持新鮮感。

AVA LIU

開業：2012年

網址：www.avaliu.com

投資：六位數

員工：6人，另聘Freelance工作者剪片

文：影視組