韓毓霞獵艷放閃麥明詩硬食檸檬
港姐麥明詩（Louisa）、韓毓霞（Wendy）代表無綫到巴西採訪奧運，連日來與攝製隊四出採訪各國運動員及周邊新聞，已擔任奧運七屆主持的韓毓霞當然識搵窿路，跟實巴西的女導遊齊齊「打獵」，向爆肌型男選手集郵，相反後生靚女Louisa就不時慘「食檸檬」，只齋換襟章，見到型男選手都只敢遠距離Selfie，認真宅氣攻心，但她笑言「食檸檬」都好，面皮厚啲都是學習。
里約熱內盧奧運在香港時間今早七時終於正式揭幕！港姐麥明詩夥拍韓毓霞代表無綫遠赴巴西採訪，她們已逗留當地兩星期多，四處搜刮奧運第一手消息為觀眾報道。兩人之前分別採訪各國運動員，Louisa更親自到機場迎接香港隊選手抵埗，前日她亦到奧運村出席升旗儀式，坦言播放國歌及升旗時，場面感動。
每年各國都有不少靚仔、靚女運動員選手出現，主持們當然不會放過機會，四出集郵影相，就連香港主持李佳芯都表示期間睇到靚仔、靚女，不過身處巴西的靚女Louisa卻相當輸蝕，性格內斂的她向運動員要求做訪問時，更多次慘「食檸檬」，最終只跟「同鄉」的高大靚仔澳洲體操運動員訪問及合照成功，最好笑的是，「宅氣」攻心的她，面對匈牙利一班高大健碩又靚仔的男選手時，竟不敢埋身合照，只悄悄遠距離Selfie，相當搞笑！
「溝」澳洲選手
Louisa接受本報記者訪問時稱：「同運動員訪問，有時連佢哋條圍繩都唔可以越過，免得騷擾到佢哋，但有啲friendly嘅，你揮手佢哋會行過嚟受訪，我喺澳洲出世，所以都有同澳洲 運動員相識吓！其實有啲運動員未必想接受訪問，所以我都有食檸檬。（第一次食檸檬？）我份人向來比較含蓄，好少會勉強人，不過依家工作需要，唔理三七二十一都要問，不過食吓檸檬都好，都係一個學習，面皮厚啲嘛！」
談到Wendy有向晒肌運動員集郵，問Louisa是否喜歡肌肉男？她坦言：「有健康體態係好，但唔係我擇偶條件。」Louisa亦透露有跟外國男記者交換襟章，她說：「呢個係一個傳統，好多電視台、國家隊都會出，我有好多TVB襟章，所以都有同佢哋換。（咁換完襟章有冇換電話？）梗係唔會啦！」
智利爆肌男
而Wendy則樂於分享她的「巴西狂熱」，她接受訪問時表示同行的巴西女導遊帶她四出採訪，每逢見到魁梧有型的男選手，就會叫她把握機會「集郵」，Wendy說：「巴西人好熱情，加上位女導遊個性比較開放，見到靚仔就鼓勵我哋出擊，喺沙灘排球場就同兩位智利選手影相，兩個都係爆肌型男，好多女性朋友都話羨慕！（叫女導遊帶你去獵艷？）佢自己應該有，我哋太多工作冇時間。」談到拍檔麥明詩，身為前輩的Wendy說：「佢係一個好優秀嘅女仔，性格活潑開朗、用心又聰明，同佢合作好舒服。」
文：影視組