關心妍出街前泵定奶
歌手關心妍（Jade）上周六在網誌宣布剖腹誕下六磅六重的小B女楊榮心（Jovia），休息六日的她昨日在老公楊長智拖實下出院。鑑於近年不少在公眾場所餵母乳的媽媽遭受歧視，剛榮升人母的歌手官恩娜便身受其害，連月來多次在網誌大呻被歧視的感受，Jade也堅持餵母乳，她表示若帶B女出街會先選擇在家中食飽才出發，她說：「喺屋企餵完先出去，又或者用冰袋帶啲人奶出去餵，如果有需要都會去商場餵人奶嘅地方餵。」
Jade表示每日睡眠時間少之又少，雖然有點辛苦，但會堅持下去，她說：「隔兩、三個鐘就要餵，唔係一件簡單事，不過會堅持落去。（餵到冇奶出？）未諗，到時先算，總之依家會全人奶。」
停工一年
問到老公有否送禮？Jade說：「冇，BB已經係好大份禮物，最緊要健康，原本尋日（前日）出院，因為太黃可能要照燈，不過食足全日人奶就冇事。（追多個？）啱啱先生，等咗七年好感恩，再有當然好啦！」隨即踢爆老公詐型：「我同佢講好開心可以廿四小時陪住BB，點知佢話我從來冇試過咁樣同佢講，終於明白做人父母嘅感動。」而Jade坦言為了照顧囡囡會停工一年。
