鎮宇o靚坤重出江湖 父子抵死鬥戲

吳鎮宇與兒子Feynman於2014年「父子兵」上陣參加內地綜藝節目《爸爸去哪兒》（第二季），繼承父親俊朗外貌的Feynman眼仔睩睩，深受觀眾愛戴，人氣爆燈！不少廣告商睇準商機，力邀兩人拍廣告，但統統被拒！不過，最近終有電影公司成功斟得鎮宇父子上陣，拍攝由鎮宇自導自演、一齣有關江湖的喜劇，是兩父子首次搭檔拍電影！

多過呢個數！

鎮宇更會演回於《古惑仔》系列中的經典角色「o靚坤」一角，味道似足當年喜劇《旺角揸Fit人》一樣，而Feynman在戲中飾演喜歡和「o靚坤」鬥氣的小演員，戲份甚重！鎮宇透露首肯讓Feynman拍戲是因為適逢暑假，希望讓兒子知道父親在片場是怎樣拍戲。電影公司亦相當識做，據知今次父子兵上陣的酬金高逾千萬！記者向鎮宇求證時，他沒有正面回應，只笑說：「流啦！梗係多過呢個數！」

8月初開拍

談到與兒子首度拍電影，鎮宇笑言「幾頭痛」，不知道囝囝能否應付，對於重演「o靚坤」一角，他說：「一直都有好多人想我演o靚坤，既然今次有集團攞到資金出嚟，就再拍番，呢個角色係大家嘅集體回憶。」

鎮宇自導自演，當然一絲不苟，幕後班底全是精英，新戲會有不少大場面，如封街拍攝大型飛車及有逾二百人講數等，吳志雄亦會演出一角，飛車場面更找來達人吳海棠操刀！電影預計8月初開拍。

文：影視組