無懼王家衛要求高 夏永康見招拆招
著名攝影師夏永康近月在港舉行多媒體藝術展，邀來20多位不同國家的當代藝術家參與。對藝術充滿熱誠的他與導演王家衛合作無間，自言在撞板中不斷學習，又透露在過往眾多合作過的藝人中，最喜歡影帝梁朝偉，大讚對方有專業的工作精神！
著名攝影師夏永康（Wing Shya）與多位巨星合作無間，包括影帝梁朝偉、影后張曼玉、名導王家衛、徐克及美術指導張叔平等，製作出不少令人深刻的佳作。近來Wing Shya在有份設立的Forward Assembly藝術平台，舉行以「Safe for Work」、「So F**king What」為題的多媒體藝術展覽，邀請超過20位來自不同國家的當代藝術家參與，望於亞洲推廣更多藝術創作。
問到主題為何為「SFW」？他說：「我哋貪玩，因為成日去啲大美術館，入到去太靜會好驚，所以做啲friendly啲嘅嘢，畀多啲學生及唔同類型嘅人嚟，親民啲。（呢個係你嘅生活態度？）我好享受做咁嘅嘢，唔同類型嘅嘢撈埋一齊就係香港！」
最愛梁朝偉
提及多位合作過的紅星，Wing Shya坦言最愛梁朝偉：「我鍾意梁朝偉，覺得佢好正。佢平時個人好casual，拍戲時我喺佢側邊影劇照，睇到佢嘅專業，我會吸收學到啲嘢，佢嘅精神係最難能可貴！張叔平、王家衛佢哋都係勁認真去做一樣嘢，好難得！徐克、洪金寶同其他導演都係，對做事嗰種專業及認真，係一個好好嘅借鏡，畀我哋呢一代同下一代嘅人去模仿。（導演王家衛出名要求高，遇到困難？）咁係我唔夠叻，如果我夠叻，就唔會有壓力。每個人都會撞板，你可以話佢要求高，亦可以話我唔夠叻，睇你點睇。」
為年輕人發聲
問到Wing Shya的創作靈感從何而來？他坦言：「創作都係見招拆招，諗到就諗，我依家比較隨意。呢輯作品講自由、掙扎，我同好多年輕人喺街傾偈攞靈感。傳統文化有啲block咗佢哋，但佢哋想喺傳統壓力下表達自己，所以輯創作都係一啲荊棘或者block咗佢哋講唔到嘢。（會否擔心突然冇靈感？）我覺得應該have fun多啲。」如冇靈感便從事商業工作，把賺到的錢再放在藝術上：「我賺到一筆錢就想使晒佢，放落fine art度。明年喺北京有個人展覽，或者我會拍套戲都未定。」他坦言會不斷努力及畀心機做好每項工作。
文：名人組