許冠傑落區開騷 後輩抓合作

久未公開露面的「歌神」許冠傑（阿Sam）將於10月假紅館開騷，昨晚率先在石硤尾的賽馬會創意藝術中心舉行戶外音樂會，為無綫拍攝音樂特輯，逾百歌迷及大學生免費入場跟「神」近距離互動！阿Sam演唱會的製作總監蕭潮順接受電話訪問時解釋今次開騷選址的因由：「阿Sam首次喺石硤尾開騷，揀呢個地點係因為佢喺蘇屋邨七層大廈長大，對呢啲舊區設計好有情意結。」

雖然在露天場地開騷，但阿Sam全程以包到冚造型現身，合共換上四套造型，期間自彈自唱多首經典金曲，包括《浪子心聲》、《鐵塔凌雲》等，又邀得多位嘉賓上台合唱，包括兒子許懷欣與許懷谷、人氣歌手許廷鏗（Albert）、胡鴻鈞（Hubert）與糖妹等。其後，阿Sam跟同為香港大學學弟的Alfred及一班學生合唱校慶歌曲《明我以德》，歌神為追求完美，全晚共四度重唱歌曲！擔任司儀的森美踢爆太太小時候是童星，曾飾演阿Sam的女兒，笑言自己是「哎吔女婿」。尾聲時，阿Sam祝福歌迷永遠開心：「得閒10月嚟睇我嘅演唱會！」

許廷鏗（左一）、糖妹（右二）、胡鴻鈞（右一） 許冠傑與年輕歌手台上合唱，歌迷耳目一新。	許懷欣（左）、許懷谷（中） 許冠傑與兒子Jam歌！	許冠傑選擇到石硤尾開騷，皆因對舊區建築有情意結。

糖妹「觸電」勁怕醜

開騷前，阿Sam下午為音樂會先進行綵排，一班歌迷提早到場霸位，親民的他跟歌迷握手。有份擔任嘉賓的Alfred透露跟阿Sam曾為校慶周年合唱歌曲：「佢仲認得我，一嚟到就叫到我個名！」講到阿Sam的紅館騷，Hubert希望昨日的表演可為自己加分，屆時有機會上台跟歌神合唱，Alfred則會度期去演唱會：「就算做唔到嘉賓都會去睇！」糖妹自言首次跟阿Sam如此近距離接觸，綵排時勁緊張，跟他對望時更怕醜得即時擰歪面：「佢電眼好迷人，Sam哥哥係我同前輩同家人好大嘅聯繫，每個人都識佢嘅歌。」

文：音樂組

攝：吳文聰