陳錦鴻鼓勵自閉囝囝成家立室
藝人陳錦鴻甘願照顧患有自閉症的兒子，犧牲自己的事業前途，近年「閉關」湊仔之餘，更親筆寫「情書」，鼓勵成年後的兒子生兒育女，肩負起家庭責任。錦鴻更未有成驚弓之鳥，坦言有意與太太再追多個！
錦鴻與太太杜雯惠育有一名9歲兒子駕樺。駕樺從小患有自閉症，錦鴻多年來負起照顧對方的責任，近年更完全消失幕前，專職做湊仔公。繼數年前他執筆寫書，以文字鼓勵自閉童的家長，與大家分享其相關經驗後，近日他再推出一本著作名為《兒子教曉我的事》，據知書展期間銷情不錯，錦鴻舉行簽名會，獲好友張錦程一家及大批中學同學撐場，場面熱鬧。
短期內不會再出書
錦鴻昨日接受電話訪問稱：「本書係寫畀我個仔第時睇嘅。雖然佢依家進展好好，打乒乓波好叻，講英文好過我，不過佢體內嘅自閉基因係唔會消失。呢類人最大嘅弊端係理會唔到其他人感受，所以佢成長後即使結到婚，我都擔心佢未能跨越由丈夫變為父親嘅身份，呢本書就係我鼓勵佢生兒育女。」他坦言該書算是駕樺兒童期的總結，短期內不會再出書：「暫時冇嘢好寫啦。我有送書畀一啲對我生命造成影響嘅前輩，包括劉兆銘同鮑起靜等，其他朋友就自己買啦。」
張錦程內地搵人仔
雖然有沉重家庭負擔，但樂天的錦鴻稱：「同太太咁多年都想再追（懷孕），只係未成事啫，我想再有嘅，不過呢啲睇天意啦。（唔做嘢？）我冇經濟壓力，又未遇到合適劇本，所以暫時以內地登台工作為主，況且港視仲有年幾約，係都要等完約先再作打算啦。」
另外，錦鴻好兄弟張錦程近年主力於內地發展，網劇《余罪》推出後，點擊率直逼《太陽的後裔》，「張錦程傅老大」更成為內地網絡潮爆的搜尋語。
文：影視組