睇戲期間遇滋擾，的確令人火滾，不過美國一名男子上周六於肯塔基州戲院睇電影《星空奇遇記：超域時空》（Star Trek Beyond），被後座小童踢櫈時，竟反應過激拔槍！
事發時男童不停踢前座的椅背，前座男戲迷暴怒企起身不停辱罵男童：「你係咪仲要繼續踢呀！」男童父親不忿還口，雙方繼而大打出手，前座戲迷更突然拔槍指嚇他說：「咁你依家仲有咩X嘢可以做呀？」其他觀眾見狀速逃，最後持槍男子被三名工作人員與部分觀眾押離戲院，警方到場將他拘捕。