歌手胡鴻鈞昨日在Instagram上載與「歌神」許冠傑（Sam）合照，胡鴻鈞說：「Sam哥明日有個音樂特輯錄影，佢邀請咗我、許廷鏗、糖妹同黎曉陽四個後輩同佢一齊jam歌，啱啱喺度綵排。」首次與歌神見面的他笑說：「我留意到佢由頭到腳都係豹紋，頭先我有啲蝦碌嘢，我因為揸車行錯路遲到，唔好意思即刻耍冧，但Sam哥好好笑容，話冇問題，仲同我握手，佢一啲架子都冇，好友善，同佢綵排時好舒服，你唔會覺得好強好大壓迫感。」
