阿倫心郁演真人騷

譚詠麟（阿倫）昨日出席電台舉行的奧運節目活動，身為「奧運之星」的他特別穿上印有「Wynners」字樣的牛仔褸，為港隊打氣，但由於有工作在身，他未能到巴西欣賞奧運：「睇電視支持。（鍾意咩項目？）保齡、羽毛球同足球，有啲項目睇唔到就會錄低。」另外，談及好友劉嘉玲及趙雅芝近日接拍內地真人騷《我們來了》（《偶像來了》第二季），阿倫笑說：「佢哋係咪拍女王來了？（有冇興趣拍真人騷？）都有人搵，不過每次都撞晒期，遇到啱都會做，好似運動、足球同推動環保都得。（依家拍唔到咪見財化水？）有乜所謂，拍真人騷好辛苦！」