蔣怡撐女整容：愈早執愈好
育有一女的名模蔣怡（CoCo）前日現身活動大談整容，自言不反對女兒整容，更揚言愈早執愈好，還會主動為對方提供安全資訊，以免女兒光顧無牌醫生，思想認真開通。
名模蔣怡、何紫綸與旗下組合星座少女、藝人吳忻熹等，前晚出席醫學美容活動。CoCo透露將為醫學美容節目任主持，問她會否因而心動想整容？她坦言：「好難講，我暫時睇咗啲稿同相，有講晒成個療程、副作用、失敗例子，睇完反而驚咗。但同專家傾完，佢講番其實失敗率唔係咁高同埋點樣做先安全，所以可能會做，真係唔知。（對自己邊度唔滿意？）冇特別，咁多年最困擾係黑眼圈。」
搵無牌醫生易出事
問到將來可會反對女兒整容？CoCo十分開通，認為科技愈來愈進步，療程比以往簡單，可能將來整容發展到如剝牙差不多，她說：「我唔會阻止，依家啲人整容嘅年紀愈來愈細，其實愈早執愈好，好過去到不可收拾嘅地步先整，預防勝於治療！（唔介意畀人話人工美女？）唔介意，小朋友大個想做乜就做，你都阻止唔到，惟有畀啲正確嘅資訊佢，鼓勵佢安全咁去做，好過偷偷地搵啲無牌醫生又或者整上癮！」
何紫綸30歲後再升Cup
至於何紫綸（Ann）透露有人向她介紹胸部療程，能測試出有否患乳癌，令她非常心動：「我有家人患過乳癌，所以都怕有遺傳。間中都會自己按摩個胸睇吓有冇硬塊同異常，試過有次摸到好硬，自己都嚇親，原來係淋巴塞咗，所以我好少用豐胸膏，亦唔會戴太緊嘅胸圍，都冇諗過會隆胸。其實人大大吓，個胸會變大，30歲之後個胸有所提升。」
文：名人組