城城踩入戲院 觀眾瘋狂
郭富城主演新片票房走勢凌厲等破紀錄，忙於演唱會綵排的他現身戲院謝票群情洶湧，他趁機呼籲粉絲集腋成裘，多多捧場齊齊「締造歷史」：「總之破（紀錄）一蚊都係破！」城城又表示歡迎一眾拍檔們稍後「踩場」慶功。
郭富城昨午偕同導演梁樂民及陸劍青現身觀塘一間戲院為《寒戰2》謝票，三人步入戲院一刻即令觀眾瘋狂，有人衝出觀眾席舉機拍照，更有粉絲「改編」戲中對白大叫：「下半世乜都唔做，淨係睇你哋做戲！」氹得城城開心不已，且「角色上身」邊揮手邊謂：「各位香港市民，大家好！今日（《寒2》）有咁嘅成績，你哋都有份嘅。呢度有幾多香港人？我哋一齊影張合照留念。」期間他又與觀眾玩問答遊戲送電影禮物，場面墟冚。
中港兩地賣座
截至昨午，《寒2》本港票房已達5千7百萬，距離當年《那些年，我們一起追的女孩》創下約6千2百萬的票房紀錄，僅僅相差500萬港元，相信日內《寒2》票房可以反超前，城城等對刷新本港開埠以來華語電影最高票房紀錄信心滿滿，而《寒2》於內地同樣勁收6.4億人民幣。
歡迎踩場慶功
近日忙於籌備下月演唱會的城城受訪時稱：「老闆想我嚟謝票，我專誠抽咗3個鐘頭出嚟。今次嘅成績絕對係團隊嘅力量，《寒戰》亦都有功勞，希望觀眾睇完又睇。（預算最終票房去到幾多？）唔諗，破咗紀錄先，破一蚊都係破嘛！（破紀錄你會做乜？）慶功嘅嘢要問老闆喎！（梁家輝話去你演唱會慶功。）12場演出都隨時歡迎。」
談到第3集的籌拍進度，陸劍青表示稍後會離港小休，假期後便與梁樂民着手研究新劇本，他強調陸續有新演員加盟，務求擦出更多的火花。
文：影視組