黎明變身明福俠飛馳 教歌迷匿埋避雷
天王黎明（Leon）一連兩晚在澳門新濠影滙綜藝館開騷，昨晚舉行第二場演出前，Leon變身「明福俠」登上蝙蝠車，與四名幸運女Fans體驗4D刺激旅程！對於頭場歌迷送上「風雨同路」四字，Leon即拋金句妙回：「咁行雷閃電記得匿埋啦！」
【衛紫敏澳門直擊】一連兩場《黎明Leon Random Love Songs Live in Studio City 2016》在澳門新濠影滙綜藝館舉行，前晚舉行首場演出前，Leon與四名幸運兒登上8字形摩天輪「影滙之星」共度難忘時刻，而昨午5時30分，他再變身「明福俠」與四名幸運兒進行任務，場館外逼爆前來親睹黎天王風采的Fans！Leon現身一刻，全場Fans瘋狂尖叫，他隨即坐上蝙蝠俠車留影，Fans識做地大叫「明福俠」，令Leon忍不住笑，而四位幸運兒亦把握機會與偶像合照，然後齊齊出發，感受4D飛行體驗「蝙蝠俠夜神飛馳」旅程，Leon事後大讚：「好正呀！」
騷前狂食做大蟒蛇
第二場演唱會於昨晚8時30分正式開騷，Leon與觀眾打招呼後唱出多首歌曲。唱《如果可以再見你》前，他自爆開騷前放縱自己吃了不少美食，包括乾炒牛河及海南雞飯：「同事話『唔怕啦，開演唱會咁辛苦！』但我話我變咗條大蟒蛇，啱啱吞咗隻羊咁！」他又笑言幸好上台前經過一條很長的長走廊，可以幫助消化，又吩咐歌迷放心：「放心，我冇食滯，見到你哋都唔會滯！」
Leon為澳門演唱會以全新造型登場，西裝、禮服充分凸顯其天王氣派！首場騷演唱期間，他的煲呔突然甩扣「吊吊揈」，他卻沒有整理，並笑言：「台下有人係咁畀手勢我，提我個煲呔甩咗，其實個煲呔甩唔甩唔重要，就算我着Tee，你哋都唔介意啦！但冬天就唔得，要着番件褸。」而開場時，他一手將身旁的黑布拉走「學魔術」，原來貌似望遠鏡的物體是「噴煙炮」，Leon勁歌熱舞時更向台下觀眾「發炮」噴出白煙效果！
提Fans揸緊手機
台下有歌迷舉起寫有「風雨同路」的燈牌，Leon妙回金句：「哦，風雨同路！咁行雷閃電記得匿埋啦！」完騷前，他看到山頂區不少觀眾都拿着手機拍攝，他亦溫馨提示：「你哋拎實手機，唔好跌咗落樓下！」然後唱出《夏日傾情》為演唱會畫上句號。另外，Leon趁開騷前現身Pre Show Party，與場內貴賓打招呼及拍照留念，令現場歌迷未開騷先興奮！
文：音樂組
攝：鄭家俊、黎志輝