簡淑兒醉用力連環摑田蕊妮
最近人氣急升、成為宅男最愛的TVB小花簡淑兒，前晚與視后田蕊妮於灣仔街頭拍外景，穿上貼身襯衣露纖腰及騷長腿的她極為吸睛。阿田扶着飲醉的簡淑兒上車時被摑了一巴，幸好二人拍攝3、4次導演已收貨。被連環摑的阿田之後全程拿着風扇仔狂吹降火。
港姐出身、現為組合「少女標本」成員的簡淑兒（Jessica）早前參演無綫處境劇《愛‧回家之八時入席》，獲一眾網民激讚靚女，指她樣子甜美，「一笑個世界就靜止咗」。人氣急升的她，前晚約10時許於灣仔街頭與田蕊妮及曾航生拍攝新劇。穿貼身襯衣兼熱褲上陣的她，露纖腰兼騷白滑長腿，引來不少途人圍觀。
阿田吹風降火
劇情講述醉酒的Jessica飲到面紅紅，腳步浮浮地由阿田扶上車，同場的曾航生則袖手旁觀，沒有意欲上前幫手。醉娃上身的Jessica不停揈手揈腳，混亂間還突然摑了阿田一巴，不過阿田未有發難，幾經艱辛才成功扶到她上車。現場所見，Jessica與阿田拍了3、4次導演才收貨，被連環摑了數巴的阿田更熱到滿頭大汗，全程拿着風扇仔勁吹「降火」。
事後阿田接受電話訪問表示首次與Jessica合作：「戲中佢演我個囡，咁飲醉酒湊佢返屋企，咪硬食咗一巴，（逼真？）大家都係演員，呢啲戲一take過搞掂最好。（有冇嬲？）做咗咁多年戲，梗係唔會嬲啦。」Jessica則大讚阿田很照顧後輩，她說：「其實摑佢一巴掌已經唔算激，小兒科，我哋劇入面有唔少受肢體碰撞，成日嗌交同郁手郁腳，試位時有就住，反而阿田叫唔好就住，叫我用力打落去，希望一take過，佢畀好大信心我，好多謝呢位前輩。」
文、攝：追蹤組