黃婉曼接受外遇撐小三錯唔晒
前天氣女郎黃婉曼（Icy）近日與身兼電影編劇、教師及作家多職的陳詠燊（Sunny）合力推出新書，分別以男人及女人的角度，為讀者拆解愛情奇難雜症，當中離不開外遇與第三者，黃婉曼直言是你情我願的選擇，「小三」未必係錯！
黃婉曼與陳詠燊已是第二次合作推出愛情散文，提到出書目的，Icy簡單一句：「希望人可以得到幸福」。《女人要幸福，不要愛上的那種男人；男人要快樂，總會避開的這種女人》，足足28個字的書名，只想帶出「女人想找幸福，男人想找快樂」。他們有相似的愛情觀，是不必處處站在道德高地之上，Sunny說：「愛情冇絕對嘅對與錯，任何人做每件事都總有原因，試吓喺對方角度諗，諗吓到底點解會發生一件咁嘅事，因為我哋要借古鑑今，最後你都會搵到出路畀自己。」
存灰色地帶
同樣認為愛情沒有簡單黑與白的Icy，面對另一半有外遇，亦有一番獨特見解，她說：「可能有一日我變成某個好蠢嘅女人，我老公返到屋企見到我會覺得好煩，佢覺得出面嘅女人畀到愛情佢，但係我又唔想離開，咁我覺得OK，可能就可以存在。其實我只係覺得呢個世界真係冇話小三就係錯，或者一段感情一定係咁，個個都有唔同嘅情況。」總括來說，愛情沒有對與錯，只有你情我願。
拒安慰讀者
經常成為讀者「樹洞」的Sunny坦言100個故事，都離不開外遇與第三者，如何在這堆「大婆」與「小三」間斡旋，Sunny說：「即使我哋寫啲嘢係幾血肉、幾醜陋都好，起碼我哋都願意去面對，你要去接受現實就係咁殘酷，世界上的確會有人造成好多傷害，你想人安慰？Sorry！我安慰你10次都幫唔到你，不如我認真話畀你聽個問題癥結係你自己都有責任，你一日唔克服，永遠都唔會快樂。」
曾到日本修讀烘焙麵包課程的Icy，最近在港密謀開麵包店，由新聞主播、主持人、人妻到麵包師，Icy說：「眼界夠闊，有自己世界，你另一半亦會尊重你，所以我經營緊愛情嘅同時，亦都經營我嘅麵包生意。」
文：張雯雯
攝：張福宏
場地：Topiary