黃智賢全力護妻禁飛來蜢

黃智賢在無綫劇集《完美叛侶》中，繼《四個女仔三個BAR》後再飾演律師，但今次不如上次般有連場官司戲，反而較着重感情戲，飾演陳豪與邵美琪之間的「第三者」，黃智賢說：「我嘅角色好似『暖男』，同邵美琪青梅竹馬，見陳豪對佢唔好，睇唔過眼就想保護佢，但又唔係好有侵略性嗰種第三者，角色好多內心戲，難在點演繹得好愛邵美琪。」

了解自然信任

黃智賢現實中的太太相當低調，一直在背後默默支持，問可有「小三」嘗試入侵兩人的婚姻？他說：「試過有啲女士想埋身，但我感覺到就即刻落閘，好避忌，因為我知道呢樣嘢對夫妻關係破壞力好大，一段關係需要好多時間去栽培、保護。」問怎樣維繫夫妻關係？他說：「我老婆返寫字樓工，我哋工作係兩個唔同世界。信用係需要時間去建立，平時要講多啲工作嘅嘢畀佢聽，等佢了解我嘅工作性質，了解多咗就會放心。」

戲骨合作愉快

提到與陳豪及邵美琪配搭是新鮮嘗試，黃智賢說：「大家都拍咗好多年戲，做戲好準確、好穩陣，合作好順暢。戲裏面同陳豪為咗邵美琪成日眼超超，仲大打出手。」

文：影視組