容祖兒車廂被壁咚嚇到搵窿捐
天后容祖兒昨日出席港鐵「開心搭‧生日獎」抽獎活動，吸引近百歌迷捧場。祖兒透露求學時經常與初戀男友搭港鐵，近年不少學生情侶在車廂親熱被放上網公審，問到祖兒有否試過在車廂有親熱行為？祖兒坦言當時年紀細加上公眾地方，不敢做出過激行為，她說：「只係試過壁咚，好驚，即刻好似過山窿喺佢隻手下面捐出去，公眾地方好擔心，自己好怕醜。」祖兒承認每遇到塞車都有衝動搭港鐵，她說：「諗到好多人、好逼同好繁忙就打消念頭，如果搭一定唔用三寶（太陽眼鏡、帽及口罩），素顏就最冇人認得。」
對於男友劉浩龍在電影《幼兒怨》被36D演員伍慧珊情挑，祖兒笑說：「咩都睇吓啦。（事前有同你講？）唔使攞批文，我平時都見好多帥哥。（情挑你男友喎？）咁佢死梗，佢人生做警察多，冇做過情戲。（一拍情戲對手就36D？）恭喜晒，送塊碌柚葉佢洗眼。」並表示不會監場。
盼男友把持得住
問到擔不擔心男友把持不住？祖兒說：「唔驚，你又點知我唔掂？我有手瓜、耳珠、眉毛同鼻哥窿，佢好呢味。（同男友預先排戲？）試就當真？到時同真實分別好大，祝佢一Take搞掂，拍攝順利，辛苦錢，搵食艱難。」
