胡定欣晒股自豪：男同事情有獨鍾！

陳展鵬、胡定欣、伍允龍、劉佩玥、袁偉豪等昨日於酒店泳池宣傳八月一日首播的新劇《城寨英雄》，眾人進行「水戰」，期間林子善吼眾女擺甫士影相時潑水，雖然傳媒慫恿袁偉豪「反艇」，但他不肯就範，非常愛錫拍檔。

男友大方唔會呷醋

此劇的主角展鵬及定欣於宣傳片及社交網中，盡顯平日少見的一面。展鵬為拍此劇的打鬥場面，經常健身操弗，更罕有於社交網上載半裸肌肉照。定欣亦不輸蝕，晒股搶鏡。她轉載監製文偉鴻剪輯的搞笑片段，當介紹劇中人物，位位藝人都出樣，定欣則只得個大屁股，喜劇感十足。於宣傳片中，更有定欣於電髮舖起勢拉扯展鵬頭髮的場面，痛到展鵬尖叫。展鵬於昨日活動表示：「係真扯！但唔驚扯甩，如果真係甩仲好，可以睇吓有冇植髮廣告拍。」

陳展鵬勤做健身，不介意晒肌益粉絲。	胡定欣對自己的股形非常自豪。	胡定欣晒股多人讚，值得犧牲。

至於定欣的晒股鏡頭，她笑言：「男同事都有讚我身形，對我hip情有獨鍾，不斷重貼。（尷尬？）起初都有，後尾知佢哋都係玩吓。（男友呷醋？）唔會，咁多男仔讚，證明我嘅付出係值得。依家都要keep住身形，可能遲啲宣傳都要着番嗰套衫。（陳展鵬話你扯甩佢頭髮仲好。）係呀？等我落水扯甩佢啲頭髮先。」

玩水戰時，陳展鵬被胡定欣「兜頭淋」。

伍允龍（右二）影合照時搭實劉佩玥膊頭。

伍允龍劉佩玥唔避忌

而伍允龍不避嫌主動搭曾傳緋聞的劉佩玥膊頭，問到有否與舊愛鍾嘉欣聯絡？他稱之前去加拿大拍攝時有傳短訊給嘉欣，但沒有提佗B的事。

文：影視組