笑老婆係豬

周潤發與太太陳薈蓮結婚多年，依然恩愛如昔，雖然發哥曾在一些訪問中自爆「我喺屋企好少出聲」，但當被問到發嫂最靚是哪個部位時，他即滔滔不絕，對發嫂這位眼中西施讚個不停！

最靚對手 廚藝一流

發哥說起關於發嫂的話題時，雖語帶調皮，但難掩一臉幸福，他說：「周太幾時都咁靚啦，最靚咪對手囉！煮到一手好好嘅新加坡菜畀我食，出面食唔到。如果要用一種動物、一個數字形容周太，周太屬豬嘅，我就覺得佢好入形入格係豬，豬其實係好聰明！數字呀？八啦，佢鍾意八，唔係八卦個八，佢鍾意發，佢鍾意呢個八字，覺得好意頭。（包括埋周潤發個『發』？）佢諗啫，周潤幾時都發啦，哈哈哈哈哈！」

「咖喱魚頭」送幾碗飯

發哥近年積極控制飲食，保持Fit爆身形，但面對發嫂烹調出的拿手好菜，又是一次理智與感情的抉擇，他說：「譬如：咖喱魚頭，配料多到不得了，佢新鮮買返嚟舂完之後爆香佢，你可以食幾碗飯，但係當你覺得呢個咖喱魚頭，我好想食多次，你聽日再食呢，嘩！冇得頂，隔咗夜之後，個咖喱香到不得了，你攞番出嚟，少少半碗仔，可以送兩碗飯。你可以淺嘗，但係食十日都得，因為嗰啲咖喱擺得喺雪櫃愈耐，佢個味就愈香，幾時你要食嘅時候攞番出嚟蒸番佢，嗰個汁我真係送兩碗飯，不過依家我食一碗飯啫，舊陣時就食三碗，食少咗啦！正o架，係好正！」

文：陳奕龍　

攝：秦健輝