傅明憲潛水 自發執垃圾
熱愛潛水的傅明憲，在欣賞海底世界的同時，更不忘身負環保任務執垃圾！她自言每次潛水都會自發性地見一件執一件，成為膠袋、膠樽的killer。而最恐怖的經驗，莫過於在海底發現衞生巾。
社交名媛傅明憲熱愛潛水，自2000年開始學潛水後，去年更執起教鞭開班授徒。潛水經驗豐富的她，曾踏足東南亞不少著名潛水熱點，如印尼、菲律賓和泰國等地。早前她第二度到訪位於馬來西亞的詩巴丹島，大讚當地生態健康，水質保持良好！
膠袋膠樽killer
她坦言愛海底世界多於地面：「海底好靜，見到好多魚同珊瑚，同城市見到嘅嘢好唔同，經常潛到唔捨得上水面。有時喺水底見到啲人類破壞過嘅痕迹，好似充斥住膠樽、膠袋、汽水罐等，又或者見到啲被炸過嘅珊瑚就會好心痛。如果潛水時見到啲垃圾都一定會執，怕被海龜食咗。（見過最恐怖嘅垃圾係乜？）見過衞生巾，嗰次真係執唔落手。」
做義工保護香港
作為潛水迷的她，直言最希望能到紅海開眼界。她又表示其實香港亦有很多適合潛水的水域：「香港有個地方叫大癩痢，其實唔差，可惜上年打風，將海底好多海葵吹走咗。」她坦言知道香港有大學舉辦珊瑚普查計劃，可惜去年錯過了，望今年能參與其中，成為義務潛水員協助海底搬泥土。
文：名人組