謝安琪張繼聰睇定BB床

謝安琪早前宣布暫別幕前一年，專心湊仔。

拖實撐枱腳

據知為支持Kay「全面休息」的決定，阿聰獨力孭起成頭家，連月來為拍劇及其他工作忙到「冇覺好瞓」，然而被冠為圈中「模範老公」的阿聰也不會冷落嬌妻，每趁工作空檔就寧願犧牲休息時間，也要為Kay炮製夫妻情趣。當日兩公婆先到戲院睇戲，之後就享受免費的window shopping，期間見兩人在一間高級嬰兒用品店駐足，更對店內一嬰兒床表現得相當有興趣，令人揣測Kay「有餡」傳聞非虛，兩人咬一輪耳仔後，未知是否訂了枱趕食情侶套餐，隨即拖到實到餐廳食晚飯。

昨日阿聰接受電話訪問，問到Kay是否懷孕？他說：「唔係，唔係，（咁點解睇BB床呀？）係有興趣睇吓啫。（未夠三個月唔講得？）未有三個月，唔係嗰啲未夠三個月唔講得，我哋會繼續努力。」

謝安琪和張繼聰駐足嬰兒用品店睇嬰兒床。	着鬆身裙的謝安琪與張繼聰甜蜜行街街。	日前張氏夫婦齊齊睇騷。

至於Kay接受電話訪問時表示暫未有喜，睇嬰兒產品是其喜好，又大讚老公說：「阿聰依家拍緊戲，好少機會晏晝得閒，難得佢有時間，我哋去咗睇場五點幾兼好騎呢嘅戲，之後就去食飯，好平常啫。」她又表示在街拖手是平日常做之事，承認兩夫妻由拍拖至婚後都是如此，她不怕肉麻說：「都好溫馨o架，我哋都幾開心o架。」