周嘉莉踩到應葉芷如見紅
氣質新人葉芷如一入行即有好機會，於新片擔正女主角，連同經理人公司「師姐」周嘉莉的戲份亦不及她。日前同樣飾演老師的二人拍攝一場群毆戲時，嘉莉不小心弄傷芷如，即第一時間幫對方治理傷口，對於無得做女主角，嘉莉說：「有能者居之！」冇得妒忌咁話！
冼國林旗下新人葉芷如一加入國藝即獲力捧，於電影《我們的6E班》擔正主角，同門師姐周嘉莉亦有份參與演出，日前二人於屯門拍攝一場學生群打戲，芷如被周嘉莉的高跟鞋踩親，混亂間芷如更扭傷腳兼腳板流血，但為免阻礙拍攝，忍痛完成該戲份，當CUT機之後，周嘉莉即上前帶師妹消毒及治理腳板的傷，並向芷如「耍冧」道歉。
不擔心爭寵
事後二人齊接受訪問，芷如被問到新加入經理人公司即「坐正」擔任電影女一，會否擔心同門的陳嘉桓、周嘉莉等會因爭寵傳不和？芷如笑言不擔心：「唔會，加入公司之後個個都對我好好，好疼錫我，好似受傷嘅時候，嘉莉都第一時間送我去治理，而面對傳媒嘅時候，師姐都會拖住我，教我點應對。」
唔介意做綠葉
周嘉莉對於師妹一入門便孭重飛，直言有能者居之，不會妒忌：「女主角呢樣嘢有能者居之，冇得妒忌o架，芷如有佢嘅能力，冼生（冼國林）畀機會無可厚非，鮮花都有綠葉嘅襯托，如果做配角可以好出色，我又唔介意！我會努力。」
文：影視組