2萬續會6年陶枳樽玩得3個月
連鎖健身中心California Fitness全線結業，令已繳費的市民成為苦主，求助無門，考獲高級私人健身牌的藝人陳蕊蕊師妹陶枳樽原來亦被波及，昨日她受訪時表示剛續了六年健身合約，但只做了兩、三個月便倒閉，大嘆無奈：「我係第一批黃埔店倒閉嘅用戶，我join咗佢哋六年會籍，啱啱完約，最近見黃埔店新裝修，又近我屋企，就再續多六年約，依家只係用咗三個月就咁！（有幾多錢？）都近二萬元，好無奈。」
蔡國威唔黑得晒
問陶枳樽可有打算去索償？她說：「聽講用咗咁少時間係可以退錢賠償，依家出面好多消息，暫時睇定啲先，亦唔知道去邊度索償或詢問。」因健身室地點近居所，通常約三五知己一起去健身聯誼，今突然全線結業，實在不知所措。
藝人蔡國威是健身中心常客，對連鎖店全線結業，他在社交網上坦言失落，他受訪時表示未算是苦主：「每個月畀三百幾蚊月費，最煩係要搵過健身中心。」經歷亞視欠薪，被指夠晒「黑仔」的他說：「自己都經歷過欠薪，希望嗰批員工可以收得番晒啲人工。」
文：名人組