靠把口打造港味唔怕蝕底=唔夠貼地？

發哥受訪時嘗試剖析個人「最香港」的特點，他說：「哈哈哈，我成日都為食，去到邊食到邊，『為食』囉，我諗呢個係香港人最衰嘅習慣。我代表香港人嘅就係會周圍篤魚蛋，食牛腩麵同雲吞麵，做呢啲好街坊嘅嘢，仲會行入街市呃飲呃食。同埋我好怕揸車，所以成日都坐交通工具，啲人可能覺得我同佢哋距離近啲啦，覺得『呢個人都唔係演員嚟喎，幾似香港人。』即係同香港市民接近啲囉！」

香港人要反省吓！
的確，在網絡搜尋「周潤發 港鐵」，即可找到發哥穿黑衫、白衫、戴黑超等多款不同搭車造型，不過與港人同步同呼吸的同時，他坦言亦有「最不香港」的一面：「我思想唔係好『香港』喎！即係好隨意，香港人好着意、好緊，覺得『我付出咁多，應該收番咁多。』或者『我付出冇咁多，都要攞夠咁多。』例如我唔會去食放題，唔會食自助餐，因為你諗吓嗰樣嘢如果咁平，有咁多嘢畀你食，其實好似係零團費嚟香港旅遊咁喎，邊有咁大隻蛤乸隨街跳？我覺得香港人要反省吓，話『物有所值喎』，其實有冇可能咁平呢？唔可能！如果可以咁平就買到嗰樣嘢，即係好似你一蚊買到隻鮑魚咁，其實你可能要排兩日攞頭位，仲要一開閘就衝入去攤位度，『叮！』咁攞到隻鮑魚先至係一蚊，咁如果你肯付出呢個代價咪OK囉！我覺得係一個願打、一個願捱。」

冇必要辛苦自己

發哥又提醒各位Less is more，不必自討苦吃：「如果你話你唔貪，其實逍遙自在好多。你食完放題後，唔食到成個人『鯨』晒喺度呀？因為你怕蝕底嘛！咁樣其實對你嘅腸胃都幾辛苦喎，係咪先？點解你唔諗吓以同樣價錢去食好啲嘅嘢？咁就唔使撐行咗自己、辛苦自己，真係冇咁嘅必要喎！我覺得自己『唔夠香港人』就係食嗰方面，因為我唔做呢樣嘢。」

文：陳奕龍

攝：秦健輝