發哥教精黎明咪中計金句補鑊唔值租
神級偶像周潤發貴為國際巨星，但為人親切友善，談吐風趣幽默，令他成為港人眼中最貼地、最能代表香港的藝人！發哥在接下來的數天將會分享「最香港」與「最不香港」的一面，並親身拆解早前包到冚現身銅鑼灣之謎，更會細數發嫂不為人知的一面！發哥在新片大談法治精神的同時，亦與讀者分享其「發字精神」，更識英雄重英雄，激讚黎明是真漢子！
在新加坡接受《東網巨星》專訪的發哥言論夠玄，與早前因中環海濱演唱會危機處理得宜而躍升為「民間特首」的另一熱門人選黎明（Leon）互相輝映，話時話，兩人曾先後飾演賭神「高進」一角，可謂無巧不成話！
我唔明，但我鍾意！
發哥激讚Leon是「真漢子」，建議對方考慮出書做才子，他說：「我有留意佢嘅演唱會，佢處理得非常好，恭喜佢！我覺得佢好聰明，同埋呢種態度非常之好，肯承擔，真漢子嘛！（有冇邊句金句令你印象比較深刻？）佢嗰啲我好多都唔係好明，都幾深，深到我都唔明！其實佢應該出一本書解釋點解佢要咁講，但係我好鍾意，係鍾意嘅！雖然我唔明，但我鍾意！」
提到同樣是「民間特首」的Leon民望急升，發哥即出口術「勸退」：「我就勸黎明唔好做，如果佢鑊鑊、日日都做錯嘢，道歉得多就假咗。黎明唔好做呀！唔好畀人講兩句就落疊，分分鐘你日日做錯一件事，日日都講金句，咁就唔值租！你唔好搞咁多，四年搞一次好啦！」