溫家偉闖影壇講心唔講金紅咗就係Bonus！

拍拖有秘笈 講真心 作狀No Way

「大隻仔」事業發展順利，但入行5年來感情一片空白，家人卻從未催促他成家。提到不乏緋聞，問到有何溝女絕招？他傻笑後大耍太極，出招扯開話題：「招式係咩意思？仲有冇其他問題？哈哈！其實都係做自己，對方想認識你，而唔係識一個唔係你嘅你。想追女仔唔使特登做啲平時唔會做嘅嘢，好似我次次都幫你做某樣嘢，係咪真係成世都Keep到先？如果唔係，對方又會話你變咗！我唔怕傳緋聞，唔需要畀壓力自己，可能會影到我同人哋行街，咁事實係行街嘛，又唔係做錯事！不過自己暫時想Focus喺事業上，我嚟香港唔係為咗拍拖，而係為咗夢想，我想做好佢！」

最近有關溫家偉的新聞中，不少都關於他「撇甩無綫」，不過他澄清只想作多線發展，向無綫大派定心丸：「新公司拍電影多，無綫都會Keep住拍劇，落筆簽嘅最大原因係我想拍電影。公司方向同我好夾，我成日覺得做得唔開心不如唔好做，但同佢哋一直都傾得好開心。我拍戲唔係因為想賺多啲或者其他表面原因，而係成個拍攝過程好唔同，而拍劇對我亦有好大幫助，如果我冇拍過劇，一嚟就拍戲，肯定學唔到咁多嘢！所以話咩『撇甩無綫』完全係錯，我選香港先生入行，一世都想喺娛樂圈發展，我由無綫出嚟，永遠都想返去拍劇，有無綫先有『大隻仔』！」

隨着參演作品愈來愈多，身在美國的家人變相有更多機會見到他，他說：「又唔會話衣錦還鄉，只係好開心，因為少機會見屋企人，佢哋喺電視見到我會好開心，仲叫我有得出鏡就要同佢哋講，連普通訪問，甚至喺後面經過一秒都要講聲！媽咪覺得我好忙好辛苦，之前仲話嚟香港幫我，不過我唔想佢同爸爸一個住香港、一個住紐約，所以就叫佢唔使過嚟，絕對唔係嫌佢煩！」

放大圖片	溫家偉選港男入行，健碩身形可說是他的Icon。	《衝線》

開工搵Surprise

「大隻仔」浮沉5年，對於最近的表演逐漸獲得觀眾認同，他說：「早啲紅、遲啲紅都冇所謂，我鍾意拍嘢，受唔受歡迎只係一個Bonus！呢幾年好幸運，好多人畀機會我，由入行完全唔識講中文一路Keep住進步，到依家愈嚟愈多機會拍嘢，我真係好開心！由細到大都知自己唔會係朝九晚五嘅人，入行最開心係每日都做唔同嘅嘢，每日都有Surprise！」

《吉祥酒店》 溫家偉向影壇進發，最想擴闊戲路，為演藝生涯帶來驚喜。	「大隻仔」揼百萬開舖做老闆，一得閒就諗計搞搞新意思。	咪睇溫家偉大大件就以為佢係「薯仔」，其實佢都好玩得o架！

他又賣花讚花香，指自己在《衝線》的表現有進步，期望將來有機會挑戰其他角色：「暫時嚟講覺得《衝線》發揮唔錯，有一場係談情戲，另一場就係羅仲謙逼我去讀書，一場開心、一場唔開心好大對比，可以畀觀眾見到我除咗傻傻哋外仲識得拍感情戲。而我亦好鍾意《鬼同你OT》，自己有追晒成套劇，拍嗰時亦好開心！我初時怕影響到進度，又好驚阿田，覺得佢好似大佬好Strong，但其實佢好Nice，好肯教我。C君同肥仔東都好好戲，仲會加啲創作入去，我冇學過戲中文又差，嗰陣都好擔心，好彩出到嚟反應好好，仲學到好多嘢！」

揼百萬開舖去到盡唔怕Fail

除了努力拍劇外，「大隻仔」又豪花7位數開雪糕店，將興趣化成一門生意。諗頭多多的他以新款式及新口味雪糕作招徠，開張短短時間已搞得有聲有色，而他有意做善事幫助有需要人士：「整雪糕係用蛋黃多，啲蛋白會捐出去畀機構，之後都想幫吓小朋友同寵物。舖頭方面Keep住每個月轉味，反應都唔錯，大家食完又開心！嚟緊都想開分店，港、澳、內地甚至外國都會考慮，我覺得想做就做盡佢，唔需要怕Fail！依家成日試食雪糕，有時又拍飲食節目少咗操弗，以前真係日日跑步、舉重同注意飲食，但依家實在太忙，即使唔使拍嘢都想落去雪糕店Make sure個質素！」

後記！「薯仔」有Say

溫家偉因身形健碩而被稱為「大隻仔」，卻因大大件而被人誤會反應遲鈍，他不禁要申冤作大平反：「我想學吓由一幢大廈跳去另一幢嗰類動作，啲人覺得我好鈍，但事實唔係！我識跳舞，Pop、Lock、Break dance都識！經理人仲想我學唱歌，但我唱得太『好』喇，唔想搶大家啲Job！我平時唱歌聽唔到自己把聲，唱嗰時覺得又On beat，啲音又準，簡直同Justin Bieber有得揮，不過之後聽番，原來係咁難聽！我之前有上過堂，不過個老師都叫我唔好唱，哈哈！」

文：專案組　

攝：劉斌

場地：House One Party香港映畫

服裝：Quiksilver