同劇演員輪流出事蔡思貝炒車割傷手
藝人蔡思貝、黃心穎、張曦雯、楊明及徐肇平等，昨日出席Corum崑崙表「Be Fun Be Bubble」腕錶鑒賞派對。楊明與蔡思貝正在拍攝劇集《心理追兇Mind Hunter》，楊明早前拍攝時不慎傷腳入院，而蔡思貝昨日出席活動前亦遇上交通意外，在金鐘夏慤道撞車被玻璃割傷手，認真黑仔！
遲了45分鐘才亮相的她身上沒有明顯傷痕，並說：「去緊化妝整頭時發生意外，同架的士有啲碰撞，我唔係太熟路。（你架車撞向架的士？）大家一齊撞，我唔係太清楚。（有冇報警？）冇，但有警察同消防車駛過，我架車左邊嘅玻璃碎咗，我有割傷，有少少流血，上咗救護車，救護人員好細心咁幫我清理身上嘅玻璃。係第一次撞車，以後會小心啲留意路面，我唔係好有駕駛經驗。」問到日後會否叫男友做司機？她笑說：「唔會啦！」又指男友有點擔心。對於她與同劇拍檔楊明相繼受傷，會否覺得是開劇前沒拜神所致？她說：「唔會。（唔信邪？）哈哈！」
楊明撐拐杖等拆線
至於楊明昨日仍撐着拐杖，並透露傷口還有八天便可拆線，提到同劇的蔡思貝發生交通意外，他說：「我聽到都諗『唔係咁邪呀？』但了解過佢冇乜大礙，冇事已經好好彩。下次拜神唔好上三支香，上足六支！其實父母有畀平安符我，但平時好少帶，最近帶番。（女友莊思明有冇畀咩你戴？）冇，畀愛心我囉！」
至於以低胸裙上陣的心穎自言迷信，每次拍劇都一定會拜神：「唔止會拜神，仲會食埋個水果！（未發生過意外？）未試過！」在旁的楊明即笑說：「你唔好講得咁大聲！」心穎聞言說：「你唔好詛咒我！」提到造型性感，酬勞是否可觀？心穎說：「我唔知價錢，條裙係佢哋揀，我尋日先由美國返嚟，一個人去咗九日，去咗個朋友屋企住。（個朋友係男定女？）男仔，不過佢屋企有男有女，我只係瞓廳咋！」
文：名人組