陳敏之佗長腿B 身痕照開工

懷孕四個月的無綫藝人陳敏之昨晚為無綫節目《Sunday好戲王》錄影，穿短裙、平底鞋的她於現場接受眾人祝福，幸福滿瀉，之前笑言會做她「太監」的森美都有摸敏之肚皮，更笑謂：「真係會郁o架？佢個BB隻腳踢佢時，一定好似佢咁長。」精神奕奕的敏之更表示比之前開胃：「之前三個月嗰陣成日都好攰，預產期係十二月，我自己好鍾意聖誕節，所以依家已收到聖誕禮物，係一個小王子。」

甩底唔做姊妹

提到BB名字，敏之表示中文名由老公William改，至於英文名交由「家姐」伍詠薇哥哥、「英文補習天王」Richard改。問敏之買BB床未？她說：「媽媽話七個月後先好買，唔使心急，依家專心安胎，想食乜就食乜。（減少工作？）停咗拍劇，其他簡單工作都會接，老公都唔反對我工作，認為大肚婆郁吓都係好事，我會身痕，喺屋企留唔到咁耐，我係工作狂，唔排除生B前一個月都做緊嘢，只要大家唔介意我肥嘟嘟就得。」

「太監」森美（右）與胡鴻鈞恭賀敏之一索得男。

梁烈唯不諱言有睇定書學做老竇。

之前敏之答應好友楊怡為婚禮做姊妹團，現時惟有推辭，敏之稱：「依家做唔到，佢話我衰嘢，因為要等佢快啲再搵人，所以之前未夠三個月我都話畀楊怡知。」問到好友梁烈唯的太太Tina是否有BB？敏之稱這些開心事由他們自己公布。

唯唯學做老竇

另一邊廂，梁烈唯昨日為電視劇《迷》客串演出，記者恭喜他時，唯唯只答：「多謝關心，有好消息會公布。（嬲胡定欣爆響口？）唔會，開心嘢。有啲嘢自己唔能夠太快講，不嬲好想做老竇，有睇定書，真係有咗就知點做，都有好多朋友分享心得。」此外，唯唯為慶祝太太Tina生日，約埋一班老友及陳敏之夫婦為她慶生，更花兩日時間自製3D蛋糕，唯唯說：「蛋糕上架車係老婆最鍾意，個蛋糕仲識着燈！」並透露送太太喜歡的背包作禮物，問會否與太太旅行？他謂：「我好想呀！不過……」應是太太暫不能坐飛機。

文：影視組