王瑋彤狙擊露股男 騎呢友夾攻妖爆

停辦四屆的香港先生早前宣布今年再舉行，昨日在無綫電視城進行首次面試，吸引61位男士參與，年紀最小的僅有17歲，最年長的38歲，雖然現場不覺眼有「星二代」出現，但發現「翻版王浩信」王瑋彤（Tony）及「露股男」梁裕恆（Flow）較為突出，力戰其餘一眾騎呢表現參賽者。

現年26歲、任職保險及模特兒的Tony，外形、樣貌及聲線都與浩信十分相似，原來他正是浩信如假包換的細佬，難怪受訪時面露尷尬之色，問到是否有人覺得他與浩信似樣？他笑說：「有。（把聲都似？）係呀！都有咁講。（增加信心？）可能啦！（同浩信有冇親戚關係？）係親細佬。（哥哥有冇畀心得你？）有支持我！」本報就此事聯絡浩信，他愕然表示不知情：「真係嚇咗一跳，不過依家佢參加咗，我作為大佬，一定會撐佢！（會唔會畀貼士？）努力為自己裝備，講真，我其實唔係好贊成佢入呢行，因為真係好辛苦，不過如果佢鍾意，我會支持佢，最緊要有信心，盡量將自己優點發放。（佢有冇你咁大隻？）佢今日好密實，其實佢內裏好Open！哈哈！佢都有操開！（邊個大隻啲？）我哋各有各忙，好少一齊操，唔知佢依家點，不過OK嘅！其實最好唔好同我扯上關係，大家以後叫佢王瑋彤，唔好叫王浩信細佬，個名咁長，要靠自己嘛，咁樣會型啲！」

睇王瑋彤手臂咁粗，大隻程度應不遜於王浩信！	Flow密實面試，私底下卻經常上載騷肌照！	小龍Cosplay成小智，仲出動埋精靈球！

認喺屋企唔着衫

而31歲、任職消防員的Flow是自戀狂，有47吋胸肌，經常在Instagram上載騷肌相，當中有一張站在海中心、露出白雪雪臀部的照片，又有在浴缸浸浴時疑似露毛照，也有去船P含住香蕉的照片，他更曾參與猛男選拔賽。問到是否很滿意自己身形才放露股相上網？他說：「未係好滿意。（咁點解露股？）自己好鍾意大自然，之前同家人去沙巴，所以喺冇人嘅地方露股。（屋企唔着衫？）係呀！喺屋企唔着衫。（你有啲相露下體？）前面我唔會露嘅。（含香蕉呢？）係船河時朋友幫我影嘅。」

最Cute港男Clyde	紋身大學生Alex	變「髮」律師Granald

「精靈球」召江若琳

候選港男中也有一堆騎呢人士，當中騎呢之最必定是以Cosplay《寵物小精靈》（現改名《精靈寶可夢》）的主角小智造型亮相、現年25歲任特殊學校助理的小龍（Jason），他繼在日出康城站拿出「精靈球」召喚江若琳大唱她的歌曲後，其後在電視城面試時，卻聲言要以精靈球收服評判的心，騎呢指數爆燈；現年26歲、擁有西班牙律師牌的Granald，頭髮剪到「一忽忽」令人印象深刻，他透露髮型乃自己傑作，更滿有信心地說：「冇自信又點會嚟報名，讀大學已經報咗兩次，因為考試冇嚟，今年再搞就再參加。」22歲的學生Clyde，會見傳媒時刻意扮「港女」晒V字甫士影相，及後更扮可愛再擺「港女十式」甫士，有點惡心！22歲在法國大學畢業的Alex，在父親陪同下現身康城港鐵站，左手露紋身的他直言不擔心會影響評審觀感。

文：影視組