「六合彩之女」周嘉莉跳入大銀幕

感激冼師傅提攜

Rachel於2011年參加亞洲小姐入行，直至亞視發生欠薪事件，她在去年離開亞視，加入冼國林開設的國藝娛樂公司成為旗下藝人。由電視圈轉投大銀幕的Rachel表示從頭學起，更學十八般武藝裝備自己，今年更首次處女拍電影，工作不斷。

「之前喺亞視做主持多，都係做娛樂同資訊性節目。有次高層帶我哋亞視藝人去影城，就係冼國林師傅嗰個，後尾同冼生嘅同事交換咗電話。有日佢哋打嚟問我有冇興趣、仲有幾耐約，結果我同亞視完咗約之後就轉咗過去。冼師傅同我講：『你要當自己係一張白紙，由頭學起。』想我學功夫、學戲，想我周身刀張張利。因為之前陳嘉桓都係咁，唔想我出到嚟好似咩都唔識。冼師傅仲親自教我功夫，同埋佢仲想我學埋電單車，想我拍戲嗰陣自己上陣，唔好用替身。今年首次拍電影，係一部校園青春片，我喺入面做訓導老師，依家仲跟緊鍾景輝上堂。」

經歷亞視拖糧，令周嘉莉學懂積穀防饑。	「六合彩之女」形象深入民心的周嘉莉，曾與夏春秋為《東網》拍攝節目《六時代》。	雖然被傳不和，但周嘉莉強調與陳嘉桓非常老友。

工作多是非亦多

回想於亞視的日子，Rachel被封為「六合彩之女」，雖然當時被拖欠薪金，但因「六合彩之女」的正面形象，令她工作不斷。正所謂人紅是非多，Rachel與同門師姐陳嘉桓屢傳不和，但她強調二人私底下是好朋友。

「2013年因為六合彩冇咗其中一個主持，要好急搵個人做，公司搵我casting，所以之後對我信心大咗，搵我做多咗主持。同埋出面有客戶搵我，聽我做過六合彩，都好有信心，因為六合彩畀人好正面。試過有個廣告casting都唔使，話我做過六合彩就得o架喇，直接嗰日就開工拍啦！同埋加入咗新公司之後，冼生話會盡佢嘅能力幫我，我一入到去，佢除咗問使唔使預支人工畀我之外，仲幫我接咗三個代言，有汽車、美容同埋佢間財務公司，所以我唔使借錢都生活到。佢都好落力咁幫我，同埋又開咗五部微電影，對我好好，等我認識咩叫拍電影，等我有一定經驗。好多人話我同陳嘉桓不和，其實根本唔係。佢私底下好鍾意去旅行，佢每次去旅行都會買手信畀我。一開始啱啱入嚟，佢話有啲裙唔啱着，一係就着過一次，話唔好浪費，叫我改短再着。我覺得OK，因為出個活動要買新衫，其實我開支都好大，連老闆娘都送好多衫畀我，佢哋對我真係好好。」

周嘉莉很感激冼國林不斷給予機會，承諾會努力工作報答對方。	因為公司想周嘉莉周身刀張張利，故她打算考電單車牌，方便將來拍戲。	周嘉莉

多病痛公司緊張

轉換新公司後，Rachel事業一帆風順，不過健康卻出現問題，先是頭痛繼而眼睛受傷。她笑言懷疑犯太歲，會好好愛惜身體，不再讓大家擔心。

「我懷疑嗰陣犯太歲，嗰陣老闆同老闆娘知道我出事，公司叫我搭最快嗰班機，派司機嚟接我，即刻車我去醫院睇醫生。依家我左眼都仲未好番，戴隱形眼鏡都只係只可以戴一邊。（做激光矯視？）未得，因為隻眼未好番，眼角膜唔可以受損。（要等？）要等啦，都成年，因為戴隱形眼鏡嗰陣都知道刮眼，所以都知道未好番。離開亞視前捱咗大半年嗰陣又好大壓力，嗰陣成日都病發。」

被拖糧學懂理財

經歷亞視拖糧及健康出問題，令Rachel上了寶貴一課，學懂積穀防饑，現在用的一分一毫亦會思前想後，希望不要浪費金錢，有錢傍身。

「自從亞視欠薪事件後，原來人係要有兩手準備，因為咁大個電視台真係可以冇糧出，唔通碌卡咩？依家買嘢都會諗一諗自己有冇需要。加入咗新公司後，衫、整頭同化妝都有贊助。大部分家用畀媽媽，每個月都係使幾千蚊。諗番嗰陣喺亞視，六合彩要繼續做落去，唔會因為冇糧出而唔做。嗰陣惟有貼車錢去做，要負番個責任。當時冇糧出，其實一百幾十都係錢，我都要對屋企負番個責任，都要畀家用，所以嗰段時間揸少啲車，搭公共交通工具。」

文：林倩怡

攝：張福宏

場地：Savoye Bistro